16.03.2026 | 23:18
ԵՄ-ն պատժամիջոցներ է սահմանել չինական և իրանական ընկերությունների նկատմամբ՝ կիբերհարձակումների համար
ԱՄՆ-ի Պետդեպարտամենտին է հղվել Սերգեյ Լավրովի հայտարարության նկատմամբ տեսակետ արտահայտելու մասին հարց. VOA
Քաղաքականություն
01.08.2018 | 20:32
Հայաստանի Հանրապետության երկրորդ նախագահ Ռոբերտ Քոչարյանին կալանավորելու առնչությամբ Ռուսաստանի արտգործնախարար Սերգեյ Լավրովի կողմից հուլիսի 31-ին հրապարակված հայտարարությունից օրեր առաջ «Ամերիկայի Ձայն»-ի հարցին ի պատասխան ԱՄՆ-ի արտաքին գերատեսչությունը տեղեկացրել էր. «Միացյալ Նահանգները հետեւողական կերպով կոչ է արել Հայաստանի իշխանություններին անցկացնել այդ իրադարձությունների վստահելի, լուրջ եւ անկախ քննություն»։
Պետդեպարտամենտի պաշտոնական ներկայացուցիչն ասել էր նաեւ, թե. «Մենք շարունակում ենք շեշտել հայաստանյան մեր գործընկերներին, որ կարեւոր է հարգել արդարադատության իրականացման միջազգայնորեն ճանաչված չափանիշները»։
Ռուսաստանի արտգործնախարարն, ավելի ուշ՝ հուլիսի 31-ին ասել է. Հայաստանում տեղի ունեցող իրադարձությունները հակասում են երկրի նոր ղեկավարների հայտարարություններին այն մասին, որ հրաժարվելու են իրենց նախորդների նկատմամբ քաղաքական հետապնդումներից։ Երբ Հայաստանում այս տարվա մայիսին քաղաքական ճգնաժամ էր, մենք մեծ գոհունակությամբ նշում էինք, որ ի վերջո այդ ճգնաժամի հանգուցալուծումը գտնվեց բոլոր քաղաքական կուսակցությունների միջև փոխզիջման արդյունքում։ Հուսով էինք, որ հիմնվելով նման արդյունքի վրա՝ Հայաստանի բոլոր քաղաքական ուժերը, առաջին հերթին՝ նոր ղեկավարությունը, նոր իշխանությունը, այսուհետ ևս կառաջնորդվեն համախմբող մոտեցումներով և կամրապնդեն ազգային միասնությունը։ Սակայն վերջին օրերի իրադարձությունները ակնհայտորեն խաթարում են այս դրական տրամադրվածությունը, հակասում են Հայաստանի նոր ղեկավարության վերջին հայտարարություններին, թե մտադրություն չունեն հետապնդումներ իրականացնել իրենց նախորդների դեմ քաղաքական նկատառումներով»։
Լավրովն իր պատասխանն ավարտել էր հետեւյալ խոսքերով. «Վերջին օրերին մենք մի քանի անգամ ենք փոխանցել մեր այս մտահոգությունները Հայաստանի իշխանություններին։ Ակնկալում ենք, որ իրավիճակը, այնուամենայնիվ, կգնա կառուցողական ճանապարհով»։
«Ամերիկայի Ձայն»-ի հայկական ծառայությունն այսօր նորից է դիմել Պետդեպարտամենտ՝ ակնկալելով Մարտի 1-ի գործի շրջանակներում Հայաստանի երկրորդ նախագահին առաջադրված սահմանադրական կարգը տապալելու մեղադրանքի եւ դրա առնչությամբ Ռուսաստանի պաշտոնական արձագանքի նկատմամբ ԱՄՆ-ի արտաքին գերատեսչության վերաբերմունքը։
