Հեղափոխության օրերին Նիկոլ Փաշինյանի դեմ աշխատելու՝ ՀՀ դեսպաններին տրված շրջաբերականի հետքերով․ ԱԳՆ պարզաբանումը

Հայաստանի արտաքին գործերի նախարարությունն արձագանքել է Factor.am-ի գրավոր հարցմանը՝ կապված հեղափոխության օրերին տարբեր երկրներում Հայաստանի դեսպանների ծավալած գործունեության հետ:

Նախարարությանն ուղղված գրավոր հարցմամբ՝ խնդրել էինք անդրադառնալ ՀԱԿ անդամ, Արտաքին գործերի նախարարության նախկին մամուլի խոսնակ Վլադիմիր Կարապետյանի այն հայտարարությանը, որ ապրիլի 21-ին և 22-ին՝ Սերժ Սարգսյանի հրաժարականից առաջ, Արտգործնախարարությունից երկու շրջաբերական է ուղարկվել տարբեր երկրներում Հայաստանի դեսպաններին` աշխատել Նիկոլ Փաշինյանի և հեղափոխության դեմ: Նաև խնդրել էինք հստակեցնել, թե ով է այդ ամենի նախաձեռնողը և դեսպաններից ովքեր են աշխատել այդ ուղղությամբ:

«Մամուլում հայտնված ԱԳՆ հանձնարարականները ՀՀ դիվանագիտական ներկայացուցիչներին տրվել են նախկին արտգործնախարար Էդվարդ Նալբանդյանի հանձնարարությամբ և այդ փաստաթղթերում ներկայացված է եղել տեղեկատվություն վերոհիշյալ հանձնարարականների օրերին արտգործնախարարի հանդիպումների, հանրապետության նախագահ Արմեն Սարգսյանի ուղերձի և երկրում առկա իրավիճակի վերաբերյալ՝ ՀՀ դեսպանների հանդիպումների ժամանակ ըստ անհրաժեշտության օգտագործելու նպատակով»,- պատասխանելով մեր գրավոր հարցմանը՝ հայտնել է ԱԳՆ մամուլի խոսնակ Տիգրան Բալայանը:

ԱԳՆ-ից նաև ընդգծել են, որ անընդունելի են համարում ՀՀ պետական կառավարման մարմնի ծառայողական բնույթի փաստաթղթերի և աշխատանքային գրագրության գործընթացի՝ մամուլում հրապարակայնացման գործելաոճը: «Միաժամանակ, հայտնում ենք, որ հիշյալ հանձնարարականներում ներկայացված տեղեկատվությունը եղել է հրապարակված համապատասխան հաղորդագրություններում»,- ասված է պատասխանում:

Ինչ վերաբերում է հարցին, թե որ դեսպաններն են շրջաբերականում տրված ցուցումների ուղղությամբ աշխատանք տարել, նախարարությունից տվել են մի փոքր անհասկանալի պատասխան․ «Ինչ վերաբերում է խնդրո առարկայի վերաբերյալ ՀՀ դեսպանների պատասխաններին, տեղեկացնում ենք, որ այդպիսիք չեն ստացվել»,- ասված է ԱԳՆ գրությունում։

Շողիկ Գալստյան