Քաղաքականություն
15.12.2023 | 12:58
Հունգարիան Եվրամիության գագաթնաժողովում արգելափակել է Ուկրաինային 50 միլիարդ եվրոյի չափով տնտեսական օգնություն հատկացնելու որոշումը, գրում է BBC-ի ռուսական ծառայությունը։
«Գիշերային հերթափոխի արդյունքները. վետո Ուկրաինայի համար հավելյալ գումարների վրա»,- «X»-ի իր միկրոբլոգում գրել է Հունգարիայի վարչապետ Վիկտոր Օրբանը:
Եվրոպական խորհրդի նախագահ Շառլ Միշելը հաստատել է, որ ԵՄ երկրների ղեկավարները չեն կարողացել համաձայնության գալ Ուկրաինային հատկացվող օգնությունը ԵՄ բյուջեի ծրագրում ներառելու հարցում։ Միշելի խոսքով՝ դրան դեմ է հանդես եկել մեկ երկիր։ Նա չի նշել այդ երկիրը, բայց ոչ ոք այլևս չի թաքցնում, որ դա Հունգարիան է:
Ըստ Միշելի՝ ԵՄ առաջնորդներն այս հարցի քննարկմանը կվերադառնան հաջորդ տարվա սկզբին։
Օրբանը երկար ժամանակ է ՝վատ հարաբերություններ ունի Ուկրաինայի հետ՝ նրան մեղադրելով հունգարական փոքրամասնությանը ճնշելու մեջ: Բացի այդ, Օրբանը երկար ժամանակ հակասությունների մեջ է Բրյուսելի հետ և այժմ փորձում է ուկրաինական լծակների օգնությամբ ապասառեցնել Հունգարիայի բաժնեմասը՝ 30 միլիարդ եվրոյի հատկացումները ԵՄ-ի ընդհանուր գումարներից:
Եվրահանձնաժողովը սառեցրել է այդ գումարը՝ Հունգարիային մեղադրելով օրենքի գերակայության սկզբունքը խախտելու, իսկ ավելի կոնկրետ՝ դատավորների անկախությունը ոտնահարելու մեջ։
Օրբանը և նրա կառավարության անդամները պարբերաբար դեմ են արտահայտվում Ռուսաստանի դեմ պատժամիջոցներին, և այն բանից հետո, երբ Մոսկվան հարձակվեց Ուկրաինայի վրա, սկսեցին խոսել ուկրաինացիներին ռազմական օգնության անիմաստության մասին:
Միաժամանակ, հրապարակայնորեն դեմ արտահայտվելով ԵՄ պատժամիջոցներին՝ Հունգարիան 2014 թվականից ի վեր լուռ և անփոփոխ քվեարկում է արդեն իսկ սահմանված պատժամիջոցների ժամկետների երկարաձգման և նորերի ներդրման օգտին: Միակ բացառությունը ռուսական նավթի էմբարգոն էր, որը մտցվել էր մեկ տարի առաջ. այստեղ Բուդապեշտը չի զիջել և հասել է իր համար էմբարգոյի հետաձգմանը։
