16.07.2026 | 01:03
ԱԱ-2026․ Եզրափակիչում՝ Իսպանիա – Արգենտինա․ ՏԵՍԱՆՅՈՒԹ
Նավալնիին չի հաջողվում գտնել
Քաղաքականություն
14.12.2023 | 15:28
Ռուսաստանցի ընդդիմադիր գործիչ Ալեքսեյ Նավալնիի մերձավորները չեն կարողանում նրան գտնել Մոսկվայի քննչական մեկուսարաններում, որտեղ, ինչպես հաղորդվում էր, նրան կարող էին տեղափոխել Վլադիմիրի գաղութից՝ վանդալիզմի մասով նոր քրեական գործի քննության համար։ Այս մասին DW-ի եթերում հայտարարել է Հակակոռուպցիոն հիմնադրամի տնօրեն Իվան Ժդանովը։
Ժդանովի խոսքով՝ այն բանից հետո, երբ ռուսական կառավարամետ «Baza»-ն հայտնել է, որ Նավալնին տեղափոխվել է Մոսկվա՝ քննչական գործողությունների համար, նա և ընդդիմադիրի մյուս համախոհները «ստուգել են Մոսկվայի քննչական մեկուսարանների մեծ մասը» և չեն գտել Ալեքսեյ Նավալնիին դրանցից որևէ մեկում:
Բացի այդ, Իվան Ժդանովը «DW News Show» հաղորդման ժամանակ նշել է, որ դեկտեմբերի 12-ին արված «Բազա»-ի հրապարակումը «մի փոքր հակասում է տրամաբանությանը», քանի որ Նավալնիի հետ քննչական գործողություններ միշտ իրականացվել են Վլադիմիրի մարզում, ուր հատուկ քննիչ է ուղարկվել։
«Այս վարկածը չի հաստատվել, անտրամաբանական է հնչում։ Հետևաբար, մենք կրկին տեղեկություն չունենք, թե որտեղ է գտնվում Ալեքսեյը»,- ասել է նա։
Դեկտեմբերի 5-ից ի վեր Նավալնիի գտնվելու վայրի և առողջության մասին տեղեկություններ չկան։ Ընդդիմադիր քաղաքական գործչի կողմնակիցները սոցիալական ցանցերում գործարկել են #WhereNavalny հեշթեգը և պարգևատրում խոստացել նրա գտնվելու վայրի մասին տեղեկությունների համար։
