Զելենսկին անդրադարձել է հարցին՝ արդյո՞ք Ուկրաինան կարող է հաղթել պատերազմում առանց դաշնակիցների օգնության

Ուկրաինայի նախագահ Վլադիմիր Զելենսկին, որն ԱՄՆ-ից վերադառնալիս ժամանել է Օսլո, հայտարարել է, որ իր առաջնահերթությունը մնում է Ուկրաինայի հակաօդային պաշտպանության ամրապնդումը։ Այս մասին գրում է Reuters-ը, որին վկայակոչում է BBC-ի ռուսական ծառայությունը։

«Այսօր մենք խոսել ենք և կխոսենք կոնկրետ բաների մասին, որոնք կարող են փրկել հազարավոր ու հազարավոր ուկրաինացիների կյանքեր, ինչպես նաև մեծացնել ճնշումը ագրեսորի նկատմամբ»,- ասել է Զելենսկին Նորվեգիայի վարչապետ Յոնաս Գահր Ստյորեի հետ համատեղ մամուլի ասուլիսում։

Ռուս զինվորականները չորեքշաբթի գիշերը բալիստիկ հրթիռներով հարձակվել են Կիևի վրա՝ երեք օրվա ընթացքում երկրորդ անգամ։ Զելենսկին ասել է, որ գիշերային հարձակման ժամանակ Ռուսաստանը թիրախավորել է քաղաքացիական ենթակառուցվածքները։

Նա նաև պատասխանել է հարցին՝ արդյո՞ք Ուկրաինան կարող է պատերազմում հաղթել առանց արևմտյան դաշնակիցների աջակցության։

«Ինչպես գիտեք՝ լայնամասշտաբ պատերազմի առաջին օրերին՝ փետրվարի 24-ին, մենք իսկապես մենակ էինք։ Դժվար էր ու շատ դժվար։ Ողբերգական շրջան մեզ ու մեր ժողովրդի համար։ Դուք տեսաք, թե ինչպես էր մեզ համար։ Մենք գրեթե օկուպացված էինք։ Բայց մենք չփախանք, չհեռացանք և ընդունեցինք այս պայքարը։ Այսպիսով, երբ դուք հարցնում եք՝ արդյո՞ք դա հնարավոր է անել առանց օգնության․․․ հնարավոր է դա անել այնպես, ինչպես եղել է: Այսինքն՝ դժվար է, շատ մարդկանց ես կորցնում։ Իսկ եթե չես ուզում կորցնել քո ժողովրդի կյանքը, զավակներիդ, քեզ անպայման պետք է իսկական հզոր պաշտպանական վահան՝ սկսած ինքնաթիռներից, վերջացրած հրետանինով»,- նշել է նա։

Իր հերթին, Նորվեգիայի վարչապետ Ստյորեն ասել է, որ Օսլոն 3 միլիարդ կրոն (273 միլիոն դոլար) կնվիրաբերի Ուկրաինային։ Այս միջոցները հանդիսանում են խորհրդարանի կողմից նախապես համաձայնեցված փաթեթի մի մասը:

Էմմա Չոբանյան