24.06.2026 | 15:19
Ֆրանսիայում Էբոլայով վարակման առաջին դեպքն է հաստատվել
Չելյաբինսկում երկու տղամարդու զրկել են ՌԴ քաղաքացիությունից՝ զինկոմիսարիատում չգրանցվելու համար
Քաղաքականություն
15.12.2023 | 16:36
Ռուսաստանում առաջին անգամ դատարանը երկու օտարերկրացու զրկել է քաղաքացիությունից՝ զինկոմիսարիատում գրանցումից խուսափելու համար։ BBC-ի ռուսական ծառայության փոխանցմամբ՝ այս տարի ավելի հաճախակի են շրջայցերը միգրանտների հետ կապված, ովքեր ստացել են ռուսական անձնագրեր, բայց չեն գրանցվել զինկոմիսարիատում։ Դրանք տեղի են ունենում Ուկրաինայի պատերազմի համար կամավորներ հավաքագրելու՝ կառավարության ագրեսիվ արշավի ֆոնին:
Չելյաբինսկի ոստիկանությունը դատարանի որոշում է ստացել երկու եղբայրների քաղաքացիությունը դադարեցնելու մասին, որոնք «հարևան երկրից Ռուսաստան են եկել և խուսափել զինվորական ծառայությունից»։
Նրանք ստիպված կլինեն լքել Ռուսաստանը։ Եթե դա չանեն կամավոր, ապա կարտաքսվեն, նշել են ՆԳՆ տարածաշրջանային վարչությունից։
Այս տարվա ապրիլին ՌԴ Պետդուման խստացրել է օրենքը, ըստ որի՝ կարելի է կորցնել ձեռք բերված քաղաքացիությունը։ Ռուսական անձնագիրն այժմ կարող է բռնագրավվել «զինվորական կեղծիքների», բանակը «վարկաբեկելու», զինվորական ծառայությունից խուսափելու, դասալքության, անցանկալի ճանաչված օտարերկրյա կամ միջազգային ոչ կառավարական կազմակերպության գործունեությանը մասնակցելու գործով դատարանի վճռից հետո, ինչպես նաև Ռուսաստանի տարածքային ամբողջականության խախտմանն ուղղված գործողությունների կոչերի համար։
