Քաղաքականություն
13.12.2023 | 15:47
ԱՄՆ նախագահ Ջո Բայդենը հրապարակային ընդունել է ՀԱՄԱՍ-ի հետ պատերազմի շուրջ ԱՄՆ-ի և Իսրայելի իշխանությունների միջև առկա տարաձայնությունները: Սպիտակ տան ղեկավարի խոսքով՝ Իսրայելը, շարունակելով ռմբակոծել Գազայի հատվածը, կորցնում է միջազգային հանրության աջակցությունը, և Բենիամին Նեթանյահուի գլխավորած կառավարությունը պետք է փոխի իր մոտեցումը ՀԱՄԱՍ-ի հետ պատերազմում, գրում է CNN-ը։
Վաշինգտոնում դեմոկրատ դոնորների հետ հանդիպմանը Բայդենը քննադատել է Իսրայելի կոշտ դիրքորոշումը և ասել, որ Նեթանյահուն պետք է փոխի իր մոտեցումը:
«Ես կարծում եմ, որ նա պետք է փոխվի», – ասել է Բայդենը՝ Նեթանյահուի կառավարությունն անվանելով «Իսրայելի պատմության մեջ ամենապահպանողականը»:
Նա զգուշացրել է, որ երկրի ռազմական արշավին աջակցությունը թուլանում է Գազայի հատվածի ուժեղ ռմբակոծությունների ֆոնին, և հավելել, որ Իսրայելի կառավարությունը «երկու պետությունների լուծում չի ցանկանում»։
Բայդենն ասել է, որ այժմ Իսրայելին «աշխարհի մեծ մասն աջակցում է», նաև ընդգծել, որ «նրանք սկսում են կորցնել այդ աջակցությունը տեղի ունեցող անխտիր ռմբակոծությունների պատճառով»:
Ավելի վաղ էլ Նեթանյահուն էր հայտարարել, որ ԱՄՆ նախագահի հետ տարակարծիք են այն հարցում, թե ինչ պետք է տեղի ունենա Գազայում պատերազմից ավարտից հետո:
Էմմա Չոբանյան
