Քաղաքականություն
13.12.2023 | 11:27
Իսրայելի պաշտպանության բանակը (IDF) սկսել է ծովի ջուրը մղել ՀԱՄԱՍ ահաբեկչական կազմակերպության գրոհայինների թունելային համալիր, հայտնում է The Wall Street Journal-ը (WSJ):
WSJ-ի փոխանցմամբ՝ Իսրայելն այս մասին զգուշացրել է ԱՄՆ-ին։ Ամերիկյան վարչակազմի ներկայացուցիչների կարծիքով, հեղեղումը կօգնի ոչնչացնել թունելներում պահվող զինամթերքը և ենթակառուցվածքները։ Գործողությունը կարող է տևել մի քանի շաբաթ։
Միաժամանակ, որոշ ամերիկացի պաշտոնյաներ մտահոգված են, որ ծովի ջրի մղումը կարող է վտանգել Գազայի հատված քաղցրահամ ջրի մատակարարումը։ Բացի այդ, կան մտահոգություններ հողի հնարավոր աղտոտման վերաբերյալ վտանգավոր նյութերից, որոնք կարող են առկա լինել թունելներում:
Իսրայելի պաշտպանության բանակը չի մեկնաբանել թունելների ոչնչացման համար ծովի ջրի օգտագործումը: Ըստ իսրայելական The Jerusalem Post թերթի՝ գործընթացը սկսվել է նոյեմբերին, երբ Իսրայելի պաշտպանության բանակը հինգ պոմպ է տեղադրել Գազայում։
Դեկտեմբերի 4-ին Իսրայելի պաշտպանության բանակը հայտնել էր Գազայի հատվածում ՀԱՄԱՍ-ի ավելի քան 800 թունելների հայտնաբերման մասին։ Դրանցից 500-ն արդեն ոչնչացվել է տարբեր մեթոդներով, այդ թվում՝ պայթուցիկ նյութերի կիրառմամբ։ Գազայի հատվածում թունելային ցանցի շինարարությունը սկսվել էր 2010 թվականին, ցանցի ընդհանուր երկարությունը 400–500 կմ է, իսկ խորությունը՝ 35 մ։
