Հրանտ Դինքին կյանքից զրկած Օգյուն Սամասթը դիմել է դատարան՝ անունը փոխելու

Պոլսահայ լրագրող Հրանտ Դինքին սպանած Օգյուն Սամասթը, որը վերջերս բանտից ազատ է արձակվել, դիմել է դատարան՝ անունը փոխելու, գրում է BirGün-ը։

Հայտնի է դարձել, որ Սամասթը գրավոր միջնորդությամբ և անունը փոխելու խնդրանքով դիմել է Աքչաաբադի քաղաքացիական առաջին ատյանի դատարան։ Դատարանը, որը կգնահատի Սամասթի հիմնավորումը, կորոշի անվանափոխության միջնորդությունը։

Հավելենք, որ օրերս Ստամբուլի դատարանը Օգյուն Սամասթի գործով նոր լսումներ էր սկսել, որն այժմ մեղադրվում է ահաբեկչության և Գյուլենի կրոնական շարժման հետ ենթադրյալ կապերի մեջ։ Դատարանը Սամասթի նկատմամբ երկրից հեռանալու արգելք էր սահմանել։

Լրատվամիջոցները նշում են, որ նրան վերջին անգամ տեսել են սև գլխարկով և ակնոցով, երբ նա դուրս էր գալիս դատարանից, ուր ժամանել էր իր կնոջ հետ ու չէր պատասխանել լրագրողների հարցերին: Նա միայն հայտարարել էր, որ ապրում է Տրապիզոնում, ավարտել է համալսարանը, եկամուտ չունի, չի աշխատում, ամուսնացած է, բայց երեխաներ չունի, այնուհետև արագ հեռացել էր՝ նստելով սև ապակիներով մեքենան, որը սպասել է դատարանի մոտ։

Նոյեմբերին Օգյուն Սամասթը պայմանական վաղաժամկետ ազատ էր արձակվել բանտից՝ «լավ վարքի» համար։ Նշվում էր, որ 16 տարի 10 ամիս բանտում գտնվող Սամասթը բավարարել է պայմանական վաղաժամկետ ազատման պայմանները՝ «անձնական զարգացման համար կատարված դիտարկումների ժամանակ լավ վարք դրսևորելով»։

Սամասթի բանտից ազատ արձակվելուց հետո նրան նոր մեղադրանք է առաջադրվել։ Նրան սպառնում է 7,5-ից մինչև 12 տարի ժամկետով ազատազրկում։

Հիշեցնենք, որ Հրանտ Դինքը սպանվել է 2007 թվականի հունվարին՝ Ստամբուլում ԱԿՈՍ պարբերականի խմբագրության շենքի դիմաց: Մարդասպան Սամասթն այդ ժամանակ 17 տարեկան էր․ նա անչափահասների դատարանի կողմից դատապարտվել էր ցմահ ազատազրկման, սակայն տարիքի պատճառով պատժաչափը կրճատվել է մեկ երրորդով: Ի վերջո, նա ընդհանուր առմամբ դատապարտվել էր 22 տարի 10 ամիս ազատազրկման։ Պատիժների կատարման մասին օրենքի համաձայն՝ Սամասթը պետք է կրեր այս պատժից 15 տարի 2 ամիսը, որից վերջին 1,5 տարին՝ պայմանական վաղաժամկետ ազատման պայմաններում։

Էմմա Չոբանյան