24.02.2026 | 23:39
Հայաստանի մի շարք հասցեներում էլեկտրաէներգիայի անջատումներ կլինեն
Կուլեբան ակնկալում է ԵՄ-ին Ուկրաինայի անդամակցության շուրջ բանակցությունների մեկնարկ
Քաղաքականություն
11.12.2023 | 21:10
Եթե դեկտեմբերի 14-15-ը նախատեսված Եվրամիության գագաթնաժողովի մասնակիցները չորոշեն բանակցություններ սկսել ԵՄ-ին Ուկրաինայի անդամակցության շուրջ, դա «կործանարար» հետևանքներ կունենա ինչպես Ուկրաինայի, այնպես էլ Եվրամիության համար: Նման կարծիք է հայտնել Ուկրաինայի արտաքին գործերի նախարար Դմիտրի Կուլեբան Բրյուսելում, որտեղ այսօր տեղի է ունեցել ԵՄ արտաքին գործերի նախարարությունների ղեկավարների հանդիպումը, գրում է DW-ի ռուսական ծառայությունը։
«Բոլոր որոշումների մայրը, ամենակարևոր որոշումը, իհարկե, անդամակցության բանակցություններ սկսելու որոշումն է։ Չեմ պատկերացնում, նույնիսկ չեմ ուզում խոսել ավերիչ հետևանքների մասին, եթե ԵՄ խորհուրդը չընդունի այս որոշումը»,- Կուլեբայի խոսքերն է մեջբերում Reuters-ը։
Ուկրաինական դիվանագիտության ղեկավարի կարծիքով՝ իրադարձությունների նման զարգացումը ցույց կտա, որ ԵՄ-ն ի վիճակի չէ կատարել իր պատմական պարտավորությունները։
Կուլեբան վստահեցրել է, որ Ուկրաինան արդեն կատարել է ԵՄ-ին անդամակցելու շուրջ բանակցությունների մեկնարկի նախապատրաստման համար ստանձնած պարտավորությունների մեծ մասը։ Մասնավորապես, չորս օրենքներից երեքը, որոնք Եվրահանձնաժողովի պահանջով պետք է ընդունվեն Ուկրաինայում մինչև 2024 թվականի մարտը, հաստատվել են երկրի խորհրդարանի կողմից և ստորագրվել նախագահի կողմից, հավելել է նա։
Խոսքը հակակոռուպցիոն օրենքի, ինչպես նաև կրթության և ազգային փոքրամասնությունների լեզուների մասին օրենքների մասին է, որոնք Հունգարիան պնդում էր ընդունել։ Միակ օրենքը, որը դեռևս չի ընդունվել, ուղղված է լոբբիստների ազդեցությունը սահմանափակելուն, սակայն այս նախաձեռնությունն արդեն գրանցվել է խորհրդարանում և պատրաստվում է ընդունման, վստահեցրել է ուկրաինացի պաշտոնյան։
