Հրազդանի ձորում կառուցել են ժամանցի վայր` հատելով 20-ից ավելի չինարի ծառ, ինչպե՞ս կարելի էր. Անահիտ Թարխանյան․ ՏԵՍԱՆՅՈՒԹ

«Ժամանակն է Ամանորին այնպիսի զարդարանքներ անել, ինչպես, օրինակ, Փարիզում և Լիոնում է արվում`լուսային մեծ շոուներ` լազերային մոտեցումներով, դա նաև զբոսաշրջիկների է հավաքում, իսկ շենքերի մեջ անցքեր բացելն անցյալ դարի մոտեցում է»,- Factor TV-ի հետ զրույցում նշում է ճարտարապետ Անահիտ Թարխանյանը` անդրադառնալով Երևանում նախաամանորյա զարդարանքին:
Նրա կարծիքով` անճաշակ և Հանրապետության Հրապարակի հետ իր բարձրությամբ ոչ ներդաշնակ է նաև Երևանի գլխավոր տոնածառը, որը, նրա խոսքով, քաղաքի ղեկավարները պետք է օր առաջ վաճառեն:

Անահիտ Թարխանյանը խոսում է նաև մայրաքաղաքում հասարակական տրանսպորտի խնդիրների մասին. «Երևանում անհրաժեշտ է ունենալ էլեկտրոնային կանգառներ, որոնց միջոցով հնարավոր կլինի տեսնել` ինչ ավտոբուս է մոտենում ավտոկայանատեղի: Ամբողջ աշխարհը լուծել է այդ հարցը, մենք`ոչ, շատ հեռու ենք դրանից»:

Երևանի քաղաքապետարանը նախաձեռնել է մայրաքաղաքի նոր գլխավոր հատակագծի մշակման աշխատանքները: Ճարտարապետն այն համոզման է, որ դա պետք է քննարկվի մասնագիտական լայն հանրության հետ. «Երբ ընդունվի և հաստատվի Երևանի նոր գլխավոր հատակագիծը, քաղաքին պարզապես անհրաժեշտ կլինի գլխավոր ճարտարապետը»:

Նրա խոսքով`եթե Երևանն ունենա գլխավոր ճարտարապետ, հնարավոր կլինի խուսափել մի շարք ցավալի իրողություններից. «Վերջերս Հրազդանի ձորում կառուցել են ժամանցի վայր, որի արդյունքում հատվել է 20-ից ավելի չինարի ծառեր, և դա այն դեպքում, երբ այդ ծառատեսակն ապրում է 500 տարի: Ինպե՞ս կարելի էր նման բան անել»։

Մանրամասները` տեսանյութում:

Աննա Բաբաջանյան