Քաղաքականություն
08.12.2023 | 15:28
Մեծ Բրիտանիայի արտաքին գործերի նախարար Դեյվիդ Քեմերոնը նախազգուշացրել է, որ ԱՄՆ Կոնգրեսում Ուկրաինային աջակցության փաթեթի արգելափակումը «սուրբծննդյան նվեր կլինի ՌԴ նախագահ Վլադիմիր Պուտինի և Չինաստանի ղեկավար Սի Ցզինպինի համար»։ Նա նման հայտարարություն է արել այն բանից հետո, երբ ԱՄՆ Սենատում հանրապետականները դեմ են հանդես եկել նախագահ Ջո Բայդենի՝ Ուկրաինային ավելի քան 60 միլիարդ դոլարի ռազմական օգնություն տրամադրելու առաջարկին, գրում է BBC-ի ռուսական ծառայությունը։
Վաշինգտոնում անվտանգության համաժողովում ունեցած ելույթում Քեմերոնը կոչ է արել դաշնակիցներին համախմբվել Կիևի շուրջ։
«Ես սա դիտարկում եմ որպես մեծագույն փորձություն, մեծագույն մարտահրավեր մեր սերնդի համար։ Մենք պատրաստվո՞ւմ ենք պաշտպանել այդ ժողովրդավարությունը։ Մենք պետք է այդ գումարը փոխանցենք ուկրաինացիներին, մենք պետք է նրանց աջակցենք ու ապահովենք Պուտինի պարտությունը։ Դրա համար, եթե այդ հատկացումները չհաստատվեն, ապա կժպտան երկու հոգի․ նրանցից մեկը Ռուսաստանում Վլադիմիր Պուտինն է, Պեկինում՝ Սի Ցզինպինը։ Ես չգիտեմ՝ դուք ինչպես, բայց ես չեմ ուզում նրանցից որևէ մեկին ամանորյա նվեր անել»,- հայտարարել է բրիտանացի պաշտոնյան։
Էմմա Չոբանյան
