18.03.2026 | 17:10
Ֆրանսիայում ՀՀ դեսպանը Սորբոն Նուվել համալսարանում ներկայացրել է Հայաստանի արտաքին քաղաքականության առաջնահերթությունները
Հրանտ Դինքին կյանքից զրկած Օգյուն Սամասթի նկատմամբ թուրքական դատարանը երկրից հեռանալու արգելք է սահմանել
Քաղաքականություն
07.12.2023 | 22:08
Ստամբուլի դատարանը պոլսահայ լրագրող Հրանտ Դինքին սպանած Օգյուն Սամասթի գործով նոր լսումներ է սկսել, որն այժմ մեղադրվում է ահաբեկչության և Գյուլենի կրոնական շարժման հետ ենթադրյալ կապերի մեջ։ Թուրքական լրատվամիջոցների հաղորդմամբ՝ դատարանը Օգյուն Սամասթի նկատմամբ երկրից հեռանալու արգելք է սահմանել։
Հիշեցնենք, որ նոյեմբերին Օգյուն Սամասթը պայմանական վաղաժամկետ ազատ էր արձակվել բանտից՝ «լավ վարքի» համար։ Նշվում էր, որ 16 տարի 10 ամիս բանտում գտնվող Սամասթը բավարարել է պայմանական վաղաժամկետ ազատման պայմանները՝ «անձնական զարգացման համար կատարված դիտարկումների ժամանակ լավ վարք դրսևորելով»։
Սամասթի բանտից ազատ արձակվելուց հետո նրան նոր մեղադրանք է առաջադրվել։ Նրան սպառնում է 7,5-ից մինչև 12 տարի ժամկետով ազատազրկում։
Հիշեցնենք, որ Հրանտ Դինքը սպանվել է 2007 թվականի հունվարին՝ Ստամբուլում ԱԿՈՍ պարբերականի խմբագրության շենքի դիմաց: Մարդասպան Սամասթն այդ ժամանակ 17 տարեկան էր․ նա անչափահասների դատարանի կողմից դատապարտվել էր ցմահ ազատազրկման, սակայն տարիքի պատճառով պատժաչափը կրճատվել է մեկ երրորդով: Ի վերջո, նա ընդհանուր առմամբ դատապարտվել էր 22 տարի 10 ամիս ազատազրկման։
Պատիժների կատարման մասին օրենքի համաձայն՝ Սամասթը պետք է կրեր այս պատժից 15 տարի 2 ամիսը, որից վերջին 1,5 տարին՝ պայմանական վաղաժամկետ ազատման պայմաններում։
Էմմա Չոբանյան
