15.01.2026 | 12:36
Նոր պատվաստանյութեր ենք ներդրել վերջին տարիներին. Ավանեսյան․ ՏԵՍԱՆՅՈՒԹ
Վաշինգտոնը կարող է իր ներդրումն ունենալ Հայաստանի ու Ադրբեջանի միջև խաղաղության գործընթացում․ Ալիևը՝ Օ՛ Բրայանին
Քաղաքականություն
07.12.2023 | 11:20
Վաշինգտոնը կարող է նպաստել Բաքվի և Երևանի միջև խաղաղության հաստատմանը` հաշվի առնելով տարածաշրջանում առկա իրողությունները։ Այս մասին հայտարարել է Ադրբեջանի նախագահ Իլհամ Ալիևը նախօրեին Բաքվում ԱՄՆ պետքարտուղարի Եվրոպայի և Եվրասիայի հարցերով օգնական Ջեյմս Օ՛Բրայանի հետ հանդիպմանը։
Ըստ ադրբեջանական կողմի հաղորդագրության՝ Ալիևը նշել է, որ աջակցում է տարածաշրջանային խաղաղության օրակարգին, և որ «հակամարտության ավարտից և Ադրբեջանի կողմից իր ինքնիշխանության ամբողջական վերականգնումից հետո խաղաղություն հաստատելու պատմական հնարավորություններ են առաջացել», և ԱՄՆ-ը, հաշվի առնելով նոր իրողությունները, կարող է նպաստել այդ գործընթացին։
Բացի այդ՝ Ալիևը դարձյալ փորձել է արադարացնել սեպտեմբերի 19-ին Արցախի դեմ իրականացրած ռազմական հարձակումն ու էթնիկ զտումը։ Նա նաև անդրադարձել է էներգետիկ ոլորտում համագործակցությանը, Կասպից և Սև ծովում իրականացվող նախագծերին, որոնք ուղղված են վերականգնվող էներգետիկայի զարգացմանը։
Օ՛ Բրայանը, ըստ ադրբեջանական կողմի, նշել է, որ ԱՄՆ-ն աջակցում է Տրանսկասպյան տրանսպորտային միջանցքի հայեցակարգի մշակմանը, ինչպես նաև Հայաստանի և Ադրբեջանի միջև հաղորդակցությունների բացման քննարկումների շարունակմանը։ Նա նշել է ամերիկա-ադրբեջանական հարաբերություններում ապագային նայելու կարևորությունը։ Փոխայցելությունների վերականգնումը դրական քայլ է համարվել երկկողմ հարաբերությունների զարգացման համար։
Ավելի վաղ հայտնել էինք, որ Բաքու կատարած այցի վերաբերյալ Ջեյմս Օ՛Բրայանը գրառում է արել։ Եվրոպայի և Եվրասիայի հարցերով ԱՄՆ-ի պետքարտուղարի օգնականը նշել է, որ պետքարտուղար Բլինքենն անհամբերությամբ սպասում է շուտով Վաշինգտոնում հյուրընկալելու արտգործնախարարներ Արարատ Միրզոյանին և Ջեյհուն Բայրամովին՝ խաղաղ բանակցությունների համար։
