Քաղաքականություն
07.12.2023 | 09:46
Եվրոպայի և Եվրասիայի հարցերով ԱՄՆ-ի պետքարտուղարի օգնական Ջեյմս Օ՛Բրայանը X—ի իր միկրոբլոգում արված գրառմամբ անդրադարձել է Բաքու կատարած այցին։
«Բաքվում դրական և կառուցողական հանդիպումներ ունեցա։ Ինչպես նախագահ Ալիևին ասացի, ԱՄՆ-ը ողջունում է Կենտրոնական բանկի կառավարչի և էներգետիկայի նախարարի այցերը, և պետքարտուղար Բլինքենն անհամբեր սպասում է շուտով Վաշինգտոնում հյուրընկալելու արտգործնախարարներ Արարատ Միրզոյանին և Ջեյհուն Բայրամովին՝ խաղաղ բանակցությունների համար»,- գրել է Օ՛Բրայանը։
Հիշեցնենք, որ Օ՛Բրայանը երեկ Բաքվում հանդիպումներ էր ունեցել Ալիևի, Բայրամովի հետ, նշել, որ տարածաշրջանում կայուն, արժանապատիվ խաղաղության հաստատումը պատմական հնարավորություններ կբացի։
Ավելի վաղ Ջեյմս Օ՛Բրայանը Սենատում Լեռնային Ղարաբաղի ապագային նվիրված լսումների ժամանակ հայտարարել էր, որ սեպտեմբերի 19-ի ագրեսիայից հետո Բաքվի հետ հարաբերությունները չեն լինի նախկինի պես, քանի դեռ Ադրբեջանն առաջընթաց չի գրանցել Հայաստանի հետ խաղաղության բանակցություններում։
Պաշտոնական Բաքուն կոշտ էր արձագանքել Միացյալ Նահանգներին՝ հրաժարվելով նոյեմբերի 20-ին Վաշինգտոնում նախատեսված Հայաստանի հետ բանակցություններից։
