Երբ սեփական դիրքորոշում հայտնելը հանգեցնում է մանդատից հրաժարվելուն

Հանրապետության երկրորդ նախագահի կալանավորումից օրեր անց լռություն պահպանող ԱԺ «Ծառուկյան» խմբակցությունում կրքեր են բորբոքվել։

Թեև երեկ մեզ հետ զրույցում խմբակցության պատգամավոր, Գագիկ Ծառուկյանի խոսնակ Իվետա Տոնոյանն ասաց, որ Ռոբերտ Քոչարյանի կալանավորման վերաբերյալ պաշտոնական հայտարարություն անել-չանելու հարց իրենց օրակարգում չկա, բայց խմբակցության պատգամավորները կարող են դրա վերաբերյալ սեփական դիրքորոշումն արտահայտել, այսօր, սակայն, պարզվեց, որ դա այդպես չէ, և սեփական դիրքորոշումը հայտնած ծառուկյանական պատգամավոր Վարդան Բոստանջյանի առաջ դրվել է պատգամավորական մանդատից հրաժարվելու պահանջ։

Երեկ Factor.am-ի հետ զրույցում Վարդան Բոստանջյանն, անդրադառնալով Ռոբերտ Քոչարյանի կալանավորմանը, ասել էր, որ կարիք չկար Ռոբերտ Քոչարյանին կալանավորել, նաև գնահատելով կատարվածն՝ ասել էր․ «Քաղաքական հալածանք չէի ասի, ավելի շուտ՝ հետապնդում է»։

Եվ ահա՝ այս տեսակետը, փաստորեն, զայրացրել է խմբակցության ղեկավարին, որը Վարդան Բոստանջյանից պահանջել է վայր դնել պատգամավորական մանդատը։

Փաստորեն, Վարդան Բոստանջյանն իր այս պատասխանով հակադրվել է օրեր առաջ դատարանում Ռոբերտ Քոչարյանի կալանավորման միջնորդության քննությանը սպասող Նաիրա Զոհրաբյանի և Սերգեյ Բագրատյանի տեսակետներին, ինչի պատճառով էլ նրան պարտադրել են հրաժարվել մանդատից։

Հիշեցնենք, որ 2-րդ նախագահի կալանավորման վերաբերյալ Նաիրա Զոհրաբյանն ասել էր, որ հարցն իրավական տիրույթում է և իրենք քաղաքական մեկնաբանություններ չեն տալու, իսկ Սերգեյ Բագրատյանն էլ հավելել էր, որ օրենքի առաջ բոլորը հավասար են, քանի որ թավշյա հեղափոխության սկզբունքներից մեկն այն է, որ պետք է արդարություն հաստատվի։

Նշենք, որ «Ծառուկյան» խմբակցության պատգամավորներն այսօր դարձել են անհասանելի և նրանց հետ կապ հաստատել չի հաջողվում։

Մեր հեռախոսազանգին պատասխանեց միայն պատգամավոր Վարդևան Գրիգորյանը, որը նշեց, որ այս պահին գտնվում է արձակուրդում և տեղյակ չէ, թէ ինչ է կատարվում իրենց խմբակցությունում։

Աղավնի Սուքիասյան