Ադրբեջանում հերթական լրագրողն է կալանավորվել

Բաքվի Խաթայի շրջանային դատարանը դեկտեմբերի 2-ին 30-օրյա կալանքի է դատապարտել Kanal-13 ինտերնետային հեռուստատեսության հաղորդավար Ռուֆաթ Մուրադլիին։ Նա մեղավոր է ճանաչվել 535.1 հոդվածով (ոստիկանության օրինական պահանջները չկատարելը)։ Ադրբեջանական լրատվամիջոցների հաղորդմամբ՝ այս մասին հայտնել է նրա փաստաբան Նազիմ Մուսաևը։

Սա վերջին շրջանում լրագրողի կալանավորման արդեն 6-րդ դեպքն է։

Փաստաբանը նշել է, որ Մուրադլին ձերբակալվել է դեկտեմբերի 2-ին Խաթայի շրջանում՝ ավտոկայանատեղիում։ Մինչ այս Մուրադլին գնացել է հարցազրույց պատրաստելու կալանավորված լրագրող Սևինջ Վաքըֆքըզիի մոր հետ։ Հարցազրույցը, սակայն, չի կայացել՝ լրագրողի մոր տանը չլինելու պատճառով։

«Մեքենան կայանելիս Ռուֆաթ Մուրադլին ձերբակալվել է քաղաքացիական հագուստով մարդկանց կողմից։ Սակայն դատարան ներկայացված ոստիկանության հաղորդագրության մեջ ասվում էր, որ նա փողոցում անպարկեշտ արտահայտություններ է օգտագործել, և երբ ոստիկանները նրան նկատողություն են արել, նա, իբր, չի ենթարկվել։ Սակայն Ռուֆաթ Մուրադլին կտրականապես հերքել է այդ մեղադրանքները»,- ասել է փաստաբանը։

Նրա խոսքով՝ պաշտպանական կողմը դատարանին խնդրել է վարույթն իրականացնել աուդիո և տեսաձայնագրություններով, սակայն դատավոր Սուլխանա Հաջիևան մերժել է՝ պատճառաբանելով դրա համար «տեխնիկական հնարավորությունների» բացակայությունը։

Մուրադլիի քույրը՝ Ֆարգա Մուրադովան էլ կարծում է, որ իր եղբայրը հետապնդվում է լրագրողական գործունեության պատճառով։

«Ռուֆաթը մտավորական է։ Նրա երբեք իրեն թույլ չի տա կոպիտ լինել որևէ մեկի հետ։ Նրան հետապնդում են լրագրողական աշխատանքի, Kanal-13-ում իր գործունեության պատճառով»,- ասել է Մուրադովան։

Նշենք, որ Ռուֆաթ Մուրադլին նաև Ադրբեջանի Ժողովրդավարության և բարեկեցության կուսակցության վարչության անդամ է, որի ղեկավար Գուբադ Իբադօղլուն նույնպես կալանավորված է։

Հիշեցնենք՝ նոյեմբերի 28-ին ընդդիմադիր Kanal 13-ի ղեկավար Ազիզ Օրուջևը Բաքվի Սաբիլի շրջանային դատարանի կողմից 3 ամսով կալանավորվել էր՝ «ապօրինի շինարարության համար», նրան սպառնում է երեք տարվա ազատազրկում։

Ավելի վաղ էլ դատարանը 4 ամսով կալանավորել էր իշխանությունների կառուպցիոն գործունեությունը հետաքննող AbzasMedia-ի տնօրեն Ուլվի Հասանլիին, գլխավոր խմբագիր Սևինջ Վաքըֆքըզիին, աշխատակից Մոհամմեդ Կեկալովին։ Նրանք մեղադրվում են փողերի մաքսանենգության մեջ։ Դեկտեմբերի 1-ին էլ Բաքվի Խաթայի դատարանը AbzasMedia-ի մեկ այլ լրագրողի՝ Նարգիզ Աբսալամովին երեք ամսով կալանավորելու որոշում էր կայացրել՝ մի խումբ անձանց կողմից նախնական համաձայնությամբ մաքսանենգության մեղադրանքով։

Ադրբեջանական լրատվամիջոցներն այսօր էլ տեղեկություններ են տարածել, որ լրագրողներ Այթաջ Մամեդլին  և Շահլա Քերիմլին են բերման ենթարկվել ոստիկանների կողմից։ Նրանց ստիպում են ջնջել իրենց նկարահանած նյութերը։

Էմմա Չոբանյան