Քաղաքականություն
04.12.2023 | 16:26
Ստամբուլում Իսլամական համագործակցության կազմակերպության (ԻՀԿ) տնտեսական միջոցառմանն ունեցած ելույթում Թուրքիայի նախագահ Ռեջեփ Թայիփ Էրդողանը կրկին մեղադրանքներ է հնչեցրել Իսրայելի և նրա ղեկավարության հասցեին։ Նա Իսրայելի վարչակազմին «մարդասպան» և «գող» է անվանել, իսկ վարչապետ Բենիամին Նեթանյահուի մասին խոսելիս հայտարարել, թե նա, ի վերջո, «դատվելու է որպես ռազմական հանցագործ», հաղորդում է TRT Haber-ը։
Էրդողանը հայտարարել է, որ Իսլամական համագործակցության կազմակերպությունը, որի հիմնադիր նպատակն է պաշտպանել Պաղեստինի դատը, կարևոր հիմք է տալիս պայքարը մեկ ձայնով և մեկ մարմնով իրականացնելու համար։ Ըստ նրա՝ Պաղեստինի հարցում միասնական դիրքորոշումը ներկայացվել է Արաբական լիգայի հետ Էր Ռիադում կայացած արտահերթ համատեղ գագաթնաժողովով, որտեղ կարևոր որոշումներ են կայացվել։ Ըստ Թուրքիայի ղեկավարի՝ գագաթնաժողովի շրջանակում ձևավորված արտգործնախարարների կոնտակտային խումբը հանդիպումներ է ունեցել տարբեր երկրներում, և «դրանք շարունակվելու են այնքան ժամանակ, քանի դեռ չի դադարել արյունահեղությունը Գազայում»։
«Իսրայելի ղեկավարները պատասխանատվություն են կրում իրենց կատարած ռազմական հանցագործությունների համար: Այս համատեքստում մենք պետք է անպայման գնահատենք ՄԱԿ-ի Մարդու իրավունքների խորհուրդը և Միջազգային քրեական դատարանը։ Նմանապես, մենք թույլ չենք տա, որ մոռացվի միջուկային զենքի հարցը, որի գոյությունն Իսրայելն ընդունում է։ Իսրայելն ունի՞ ատոմային ռումբ։ Ունի, բայց եթե հարցնես, ասում են՝ չկա։ Մենք շատ լավ գիտենք, թե սա ինչ է։ Նեթանյահուն ռազմական հանցագործ է, և նրան անպայման դատելու են այնպես, ինչպես Միլոշևիչին դատեցին»,- ասել է Էրդողանը։
Հիշեցնենք՝ որ ավելի վաղ էլ Էրդողանը Նեթանյահուին անվանել էր «Գազայի դահիճ», իսկ Իսրայելը՝ «ահաբեկչական պետություն»։
Էմմա Չոբանյան
