15.01.2026 | 12:36
Նոր պատվաստանյութեր ենք ներդրել վերջին տարիներին. Ավանեսյան․ ՏԵՍԱՆՅՈՒԹ
Ադրբեջանում ևս մեկ լրագրող է ձերբակալվել
Քաղաքականություն
30.11.2023 | 22:16
Ադրբեջանի իշխանությունները շարունակում են անկախ լրատվամիջոցների նկատմամբ ճնշումները․ տեղական լրատվամիջոցները հաղորդում են ևս մեկ լրագրողի՝ Նարգիզ Աբսալամովայի ձերբակալության մասին։
Անկախ «AbzasMedia»-ի հետ համագործակցող լրագրողն այսօր հրավիրվել է Բաքվի քաղաքային ոստիկանություն՝ ցուցմունք տալու համար, սակայն այստեղից բերման է ենթարկվել Խաթայի շրջանի ոստիկանության բաժին։ Նրա դեմ քրեական գործ է հարուցվել դարձյալ փողերի մաքսանենգության հոդվածով, ինչպես «AbzasMedia»-ի մյուս աշխատակիցներին։
Հավելենք, որ Ադրբեջանի իշխանությունները վերջին օրերին 4 լրագրողի են կալանավորել։ Նախ՝ դատարանը 4 ամսով կալանավորել էր իշխանությունների կառուպցիոն գործունեությունը հետաքննող AbzasMedia-ի տնօրեն Ուլվի Հասանլիին, գլխավոր խմբագիր Սևինջ Վաքըֆքըզիին, աշխատակից Մոհամմեդ Կեկալովին։ Նրանք մեղադրվում են փողերի մաքսանենգության մեջ։ Այնուհետև ձերբակալվել էր ընդդիմադիր Kanal 13-ի ղեկավար Ազիզ Օրուջևը։ Բաքվի Սաբիլի շրջանային դատարանը նրան 3 ամսով կալանավորելու որոշում է կայացրել։ Օրուջևը մեղադրվում է «ապօրինի շինարարության մեջ», նրան սպառնում է երեք տարվա ազատազրկում։
Նշենք նաև, որ ԱՄՆ-ը, ԵՄ-ն, ինչպես նաև միջազգային տարբեր կառույցներ իրենց մտահոգությունն են հայտնել Ադրբեջանում լրագրողների նկատմամբ տեղի ունեցող ձերբակալությունների վերաբերյալ։
Էմմա Չոբանյան
