19.06.2026 | 14:05
Մայրն ու տատը մեղավոր են ճանաչվել նորածնի մահվան գործով, բայց չեն ազատազրկվի
ԱՄՆ Պետդեպը USAID-ի դեմ Բաքվի մեղադրանքները «կեղծ և սկզբունքորեն սխալ մեկնաբանություն» է որակել
Քաղաքականություն
29.11.2023 | 22:43
ԱՄՆ-ը վերահաստատել է իր մտահոգությունը Ադրբեջանում անկախ լրագրողների կալանավորումների ալիքի կապակցությամբ, որտեղ արդեն 4 լրագրող է կալանավորվել։
«Մենք խորապես մտահոգված ենք լրագրողների կալանավորմամբ՝ Ուլվի Հասանլիի, Սևինջ Վաքըֆքըզիի, Ազիզ Օրուջևի ու Մոմամմեդ Կեկալովի, որը նաև քաղաքացիական ակտիվիստ է։ Մենք կոչ ենք անում Ադրբեջանի կառավարությանը հարգել բոլորի մարդու իրավունքները և հիմնարար ազատությունները, ներառյալ՝ նրանց, որոնք օգտագործում են խոսքի ազատությունը»,- այսպես է մեկնաբանել Պետքարտուղարության ներկայացուցիչը ադրբեջանական «Թուրան» գործակալության հարցմանն ի պատասխան։
Նշենք, որ Ադրբեջանում լրագրողների նկատմամբ ճնշումների վերջին զոհը Kanal 13-ի ղեկավար Ազիզ Օրուջևն է։ Նախօրեին Բաքվի Սաբիլի շրջանային դատարանն Օրուջևին 3 ամսով կալանավորելու որոշում է կայացրել։ Նա մեղադրվում է «ապօրինի շինարարության մեջ», Օրուջևին սպառնում է երեք տարվա ազատազրկում։
Ավելի վաղ էլ դատարանը 4 ամսով կալանավորվել էր իշխանությունների կառուպցիոն գործունեությունը հետաքննող AbzasMedia-ի տնօրեն Ուլվի Հասանլիին, գլխավոր խմբագիր Սևինջ Վաքըֆքըզիին, աշխատակից Մոհամեդ Կեկալովին։ Նրանք մեղադրվում են փողերի մասքսանենգության մեջ։
Այս մեղադրանքների ֆոնին ադրբեջանական մի շարք լրատվամիջոցներ հրապարակումներ են արել այն մասին, որ AbzasMedia-ի նման լրատվամիջոցներն «ապօրինի ֆինանսավորվել են արևմտյան դոնորների», այդ թվում՝ ԱՄՆ Միջազգային զարգացման գործակալության (USAID) կողմից:
«Թուրան»-ի հարցին, թե ինչո՞ւ է USAID-ն հարձակումների թիրախ դարձել տարածաշրջանում, Պետքարտուղարության պաշտոնյան ասել է. «ԱՄՆ ՄԶԳ աջակցության ծրագրերին ուղղված նման մեղադրանքները կեղծ են և սկզբունքորեն սխալ են բնութագրում մեր օգնության նպատակները։ Ինչպես միշտ՝ մեր օգնությունը թափանցիկ է։ ԱՄՆ ՄԶԳ ծրագրերն ամբողջ աշխարհում խթանում են ժողովրդավարական արժեքները՝ ուղղված ազատ և խաղաղ հասարակություններին»։
Հավելենք, որ Արցախից բռնի տեղահանվածներին լրացուցիչ օգնության մասին հայտարարումից հետո պաշտոնական Բաքուն սկսել էր մեղադրանքներ հնչեցնել ՄԶԳ-ի և նրա ղեկավար Սամանթա Փաուերի հասցեին։ Մասնավորապես, Ադրբեջանի նախագահի օգնական Հիքմեթ Հաջիևը սոցցանցում գրառում էր արել՝ ԱՄՆ-ին մեղադրելով «ադրբեջանական հողերի օկուպացիայի ընթացքում ագրեսոր» Հայաստանի կողքին կանգնելու համար։
«Ադրբեջանաֆոբիան, թուրքաֆոբիան, քաղաքական կոռուպցիան, փողերի լվացումը և քաղաքական շահարկումները, այսպես կոչված, «Ավրորա» մրցանակի շրջանակում ակնհայտորեն Ռուբեն Վարդանյանի և Սամանթա Փաուերի ընդհանուր արժեքներն ու շահերն էին։ Դիմակները հանված են։ Ադրբեջանում այլևս տեղ չկա USAID-ի գործունեության համար»,- գրել էր Հաջիևը։
Նշենք նաև, որ օրերս էլ Բաքվում ԱՄՆ դեսպանատունն իր միջոցառումն էր հետաձգել ադրբեջանական ԶԼՄ-ում հրապարակումներից հետո, թե «ամերիկյան լրտեսական ցանցի հանդիպում է տեղի ունենալու»։
Էմմա Չոբանյան
