Ադրբեջանի ԱԳՆ-ն են կանչվել Բաքվում Ֆրանսիայի դեսպանը, ԱՄՆ-ի և Գերմանիայի գործերի ժամանակավոր հավատարմատարները

Բաքվում ԱՄՆ-ի և Գերմանիայի գործերի ժամանակավոր հավատարմատարները, ինչպես նաև Ֆրանսիայի արտակարգ և լիազոր դեսպանն առանձին-առանձին հրավիրվել են Ադրբեջանի ԱԳՆ-ն։ Ըստ հաղորդագրության՝ նրանց ուշադրությունն է հրավիրվել այն հանգամանքի վրա, որ Abzas Media-ն այդ երկրներում գրանցված կազմակերպությունների մասնակցությամբ «իրականացրել է անօրինական ֆինանսական գործարքներ, որոնցում ներգրավված են եղել նաև այդ երկրների դեսպանատները», և դրա հետ կապված լուրջ մտահոգություն է հայտնվել։

Նշվել է, որ «ԱՄՆ Միջազգային զարգացման գործակալությունը, FreedomNow-ն, New Democracy Fund-ը և այլ կազմակերպություններ անօրինական կերպով ֆինանսական միջոցներ են փոխանցել Ադրբեջանի տարածք՝ խախտելով դրամաշնորհների տրամադրման կանոնները, ինչպես նաև անօրինական ներդրում են կատարել AbzasMedia-ի գործունեության մեջ»։

Բաքուն դեսպաններին բողոքներ է հայտնել՝ նշելով, որ դրամաշնորհային պայմանագրերը ենթակա են պետական ​​գրանցման՝ համապատասխան կարգով, իսկ չգրանցված նախագծերին միջոցների հատկացումը երկրի օրենսդրության կոպիտ խախտում է։ Ասվել է նաև, որ տեղական լրատվամիջոցների ֆինանսավորումն օտարերկրյա պետությունների ֆիզիկական կամ իրավաբանական անձանց կողմից չի թույլատրվում։

«Նշվել է, որ այդ երկրների դեսպանատների և նրանց կազմակերպությունների անօրինական գործողությունները մեր երկրի տարածքում հանդիսանում են դիվանագիտական ​​հարաբերությունների մասին Վիեննայի կոնվենցիայի խախտում։ Ադրբեջանական կողմը խստորեն դատապարտել է մեր երկրի օրենսդրությանը հակասող և երկրի ներքին գործերին միջամտելուն ուղղված այս գործողությունները և ուշադրություն հրավիրել, որ իրեն իրավունք է վերապահում ձեռնարկել համապատասխան միջոցներ»,- ասվում է ադրբեջանական կողմի տարածած հաղորդագրության մեջ։

Հիշեցնենք, որ վերջերս կալանավորվել են Ադրբեջանի իշխանությունների կոռուպցիոն գործունեությունը հետաքննող և մարդու իրավունքների թեմայով հրապարակումներով հայտնի անկախ Abzas Media-ի ղեկավարներն ու լրագրողները։ Բացի այդ, Բաքվում արշավ է սկսվել ԱՄՆ-ի դեմ։

Էմմա Չոբանյան