16.01.2025 | 23:02
Հասել ենք հարաբերությունների նոր մակարդակի․ Զելենսկին՝ Սթարմերի այցի մասին
Ալիևը Բլինքենին խնդրել է վերացնել Ադրբեջանի բարձրաստիճան պաշտոնյաների` ԱՄՆ այցելությունների վիզայի արգելքը
Քաղաքականություն
28.11.2023 | 13:12
ԱՄՆ պետքարտուղար Էնթոնի Բլինքենի և Ադրբեջանի նախագահ Իլհամ Ալիևի՝ նախօրեին տեղի ունեցած հեռախոսազրույցի վերաբերյալ ադրբեջանական կողմը հրապարակել է իր հաղորդագրությունը։ Մասնավորապես, Ադրբեջանի նախագահականի հաղորդագրության մեջ ասվում է, որ Ալիևը նշել է, թե Բաքվի հասցեին ԱՄՆ-ի վերջին հայտարարություններն ու քայլերը լուրջ վնաս են հասցրել ադրբեջանա-ամերիկյան հարաբերություններին։
Ալիևը հայտարարել է, թե 2023 թվականի նոյեմբերի 15-ին ԱՄՆ պետքարտուղարի տեղակալ Ջեյմս Օ՛Բրայանի՝ Ներկայացուցիչների պալատի արտաքին հարաբերությունների հանձնաժողովի լսումների ժամանակ արտահայտած տեսակետները «կողմնակալ են, չեն արտացոլում ճշմարտությունը և մերժվել են Ադրբեջանի կողմից»։ Ընդգծվել է, որ ադրբեջանական կողմը հաշվի է առել ԱՄՆ-ի կողմից Ադրբեջանի հետ կապված երկկողմ հանդիպումների և բարձր մակարդակով շփումների չեղարկումը և այն հայտարարությունը, որ «մեր երկկողմ հարաբերությունները նախկինի նման չեն կարող լինել» և համարժեք արձագանքել է դրան։
Ըստ ադրբեջանական կողմի՝ Բլինքենը «խնդրել է ԱՄՆ պետքարտուղարի օգնական Ջեյմս Օ՛Բրայենին թույլ տալ դեկտեմբերին այցելել Ադրբեջան՝ հարաբերությունները կարգավորելու նպատակով», իսկ Իլհամ Ալիևը համաձայնել է այդ առաջարկին՝ պայմանով, որ «այդ այցից հետո կվերացվի Ադրբեջանի բարձրաստիճան պաշտոնյաների՝ ԱՄՆ այցելությունների վիզայի արգելքը»։ Նշվում է, որ Բլինքենը համաձայնել է։
Անդրադառնալով ՀՀ-Ադրբեջան կարգավորմանը՝ Ալիևն ասել է, թե հայկական կողմը, իբր, ուշացումով է պատասխանել խաղաղության պայմանագրի առաջարկներին։
Բլինքենն ու Ալիևը մտքեր են փոխանակել նաև Հայաստան-Ադրբեջան պետական սահմանի սահմանազատման հանձնաժողովների հերթական նիստի վերաբերյալ, որը տեղի է ունենալու նոյեմբերի 30-ին։
Հավելենք, որ ամերիկյան կողմը Բլինքեն-Ալիև հեռախոսազրույցի վերաբերյալ տարածած հաղորդագրության մեջ նշել էր, որ պետքարտուղարը ողջունել է Ադրբեջանի և Հայաստանի միջև երկարատև ու արժանապատիվ խաղաղության համաձայնագիր կնքելու՝ Ալիևի հանձնառությունը։ Պետքարտուղարն ընդգծել է, որ ճանաչում է այն տառապանքը, որն այս երկարատև հակամարտությունը պատճառել է ինչպես ադրբեջանցիներին, այնպես էլ հայերին, և նշել է այն օգուտները, որոնք խաղաղությունը կբերի բոլորին տարածաշրջանում:
«Պետքարտուղարը Ադրբեջանի նախագահի հետ քննարկել է հարաբերություններում վերջին անհանգստացնող կետերը, ինչպես նաև խոսել համագործակցության ամրապնդման հնարավորությունների մասին, հատկապես խաղաղ գործընթացի շուրջ, և բարձր մակարդակի ներգրավվածության կարևորության մասին»,- ասվում է հաղորդագրության մեջ։
Էմմա Չոբանյան
