14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Ինչու է լռում «Ծառուկյան» խմբակցությունը
Քաղաքականություն
30.07.2018 | 12:15
ՀՀ 2-րդ նախագահ Ռոբերտ Քոչարյանի կալանավորման վերաբերյալ հայտարարություններով են հանդես եկել Ազգային ժողովի «Հանրապետական» և «Հայ Հեղափոխական դաշնակցություն» խմբակցությունները։ Ըստ ՀՀԿ-ի տարածած հայտարարության՝ Ռոբերտ Քոչարյանի դեմ հարուցված գործը խորապես վնասելու է ՀՀ ներքաղաքական զարգացումներին։
ՀՅԴ-ն էլ 2-րդ նախագահին և 2008-ի իշխանությունների այլ ներկայացուցիչների՝ սահմանադրական կարգը տապալելու մեղադրանք ներկայացնելը խիստ մտահոգիչ է համարել՝ նշելով, որ դա կարող է մեկնաբանվել որպես քաղաքական հալածանք։
Հետաքրքիր է, որ առայժմ Ռոբերտ Քոչարյանի կալանավորման վերաբերյալ որեւէ հայտարարություն չի արել «Ծառուկյան» դաշինքը։
Թե ինչպիսին է դաշինքի տեսակետը՝ Factor.am-ը փորձեց պարզել ԱԺ «Ծառուկյան» խմբակցության պատգամավոր Իվետա Տոնոյանից։
Նա նշեց, որ խմբակցությունը կատարվածի վերաբերյալ չի պատրաստվում հայտարարությամբ հանդես գալ․ «Խմբակցության առանձին պատգամավորներ կարող են արտահայտել իրենց տեսակետը, սակայն, «Ծառուկյան» խմբակցության անունից մենք այս պահին հայտարարությամբ հանդես գալ չենք պատրաստվում․ օրակարգում այդ հարցը դրված չէ։
Առհասարակ, կարծում ենք, որ սա իրավական գործընթաց է, ուստի, պետք է սպասել այդ գործընթացի արդյունքներին։ Այս փուլում ձեռնպահ կմնանք հայտարարություններից»,-ասաց պատգամավորը։
Իվետա Տոնոյանից, ով նաեւ Գագիկ Ծառուկյանի խոսնակն է, փորձեցինք ճշտել անձամբ խմբակցության ղեկավարի գնահատականը Ռոբերտ Քոչարյանի շուրջ կատարվողի վերաբերյալ։
Ի պատասխան՝ Տոնոյանն ասաց, որ Գագիկ Ծառուկյանի գնահատականը կներկայացնի մեկ ժամ անց։
Աղավնի Սուքիասյան
