Սաստիկ փոթորիկներն ու ջրեղեղները Թուրքիայում երկու մարդու կյանք են խլել, կան վիրավորներ․ ԼՈՒՍԱՆԿԱՐՆԵՐ

Հանգստյան օրերին Թուրքիան տուժել է սաստիկ փոթորիկների և ջրհեղեղների հետևանքով. զոհեր կան, վնասներ և տրանսպորտի խափանումներ են գրանցվել երկրի մի շարք քաղաքներում, ծովափնյա Իզմիր քաղաքը հեղեղվել է՝ Վենետիկին նմանվելու աստիճան։

Թուրքական լրատվամիջոցների հաղորդմամբ՝ Քոնիայում 62-ամյա տղամարդ է մահացել․ հեղեղը քշել է նրա մեքենան: Տղամարդու դին ավելի ուշ դուրս են բերել փրկարարները։ Սինոպում ևս մեկ մարդ է մահացել՝ հորդառատ անձրևի պատճառով փլուզված պատի տակ մնալուց հետո: 58-ամյա տուժողը շինհրապարակում է աշխատել, երբ պատը փլուզվել է նրա վրա։ Տղամարդուն տեղափոխել են հիվանդանոց, սակայն նրան փրկել չի հաջողվել։

Անկարայի Շերեֆլիկոչհիսարի զորանոցում փոթորկի հետևանքով կոտրված ապակին 4 զինվորի է վնասել։ Քոնիայում էլ  փլուզման հետևանքով 4 մարդ է վիրավորել,  Գիրեսունում տանիքի փլուզման հետևանքով տուժել է երկու քաղաքացի։

Իզմիրում՝ մեծությամբ Թուրքիայի երրորդ քաղաքում, աննախադեպ ջրհեղեղ է եղել, տեղատարափ անձրևը փողոցները վերածել է գետերի և ջրի տակ թողել մեքենաներն ու շենքերը: Քաղաքապետ Թունչ Սոյերն ասել է, որ տեղումներն ամենաառատն են եղել վերջին 80 տարվա ընթացքում։ Նա նշել է, որ ջրհեղեղից վնասվել է ավելի քան 2000 շենք և կոչ է արել քաղաքացիներին մնալ տանը:

Փոթորիկներից և ջրհեղեղներից տուժել են նաև Թուրքիայի այլ քաղաքներ, ինչպիսիք են Ստամբուլը, Անկարան, Բուրսան, Անթալիան և Ադանան, որտեղ անձրևից և քամուց վնասվել են ճանապարհներ, կամուրջներ, տներ և բիզնես օբյեկտներ:

Էմմա Չոբանյան