Քաղաքականություն
21.11.2023 | 18:51
ՀԱՄԱՍ-ի հետ Իսրայելի պատերազմի մեկնարկից ի վեր ԱՄՆ իշխանություններն ավելի քան 30%-ով կրճատել են Ուկրաինային հրետանային արկերի մատակարարումը։ Այս մասին հայտնում է ABC News-ը՝ վկայակոչելով Կիևում բարձրաստիճան աղբյուրին, փոխանցում է BBC-ի ռուսական ծառայությունը։
Խոսքը 155 մմ տրամաչափի արկերի մասին է, որոնք օգտագործում են ՆԱՏՕ-ի զորքերը, և որոնց բաժին է ընկել Ուկրաինային սպառազինության մատակարարումների գրեթե 60-70 տոկոսը։ Ըստ լրատվամիջոցի՝ այդ զինամթերքի մատակարարումները չափազանց կարևոր են Կիևի համար։
Աղբյուրն արկերի մատակարարումների կրճատման մասին հայտնել է Պենտագոնի ղեկավար Լլոյդ Օսթինի՝ Կիև այցից մեկ օր առաջ։
Նախօրեին Ուկրաինայի մայրաքաղաք կատարած այցի ժամանակ ԱՄՆ պաշտպանության նախարար Լլոյդ Օսթինը ևս մեկ անգամ հավաստիացրել էր Կիևին, որ «ԱՄՆ-ը կշարունակի աջակցել Ուկրաինային ռուսական ագրեսիայի դեմ ազատության համար պայքարում»։
Սպիտակ տունը ևս նախկինում բազմիցս հայտարարել է Կիևին հետագա աջակցության անհրաժեշտության մասին։ Սակայն, լրատվամիջոցի աղբյուրի խոսքով, չնայած Վաշինգտոնի հասվաստիացումներին, որ Ուկրաինային օգնությունը չի կրճատվի Իսրայել-ՀԱՄԱՍ պատերազմի պատճառով, Կիևին ռազմական մատակարարումները հոկտեմբերի սկզբից զգալիորեն կրճատվել են։
Էմմա Չոբանյան
