23.11.2024 | 20:00
Չի ներկայացվել գույքի և ունեցվածքի 509 հայտարարագիր՝ 4 տարում․ ի՞նչ է սպասվում օրինախախտներին. ՔՆՆԱՐԿՈՒՄ
Ադրբեջանի Մեջլիսը հայտարարություն է ընդունել ԱՄՆ Սենատի բանաձևին ի պատասխան
Քաղաքականություն
21.11.2023 | 20:16
Ադրբեջանի Միլլի Մեջլիսի այսօրվա նիստում պատգամավորներն անդրադարձել են ԱՄՆ Սենատի կողմից ընդունված «Հայկական պաշտպանության ակտ» օրինագծին։ Մեջլիսն այս փաստաթղթին ի պատասխան՝ հայտարարություն է ընդունել։
Մասնավորապես, դրանում ասվում է, որ «Մեջլիսը վճռականորեն մերժում է ԱՄՆ Սենատում Ադրբեջանի դեմ ընդունված ակտը, այն համարում է լուրջ հարված երկու երկրների հարաբերություններին, և որ այն լուրջ խոչընդոտ է տարածաշրջանում խաղաղություն հաստատելու ջանքերի համար»։
Բացի այդ, Բաքուն ԱՄՆ-ին մեղադրել է Արցախին աջակցություն ցուցաբերելու համար։
«ԱՄՆ-ի՝ որպես միջնորդի ներկայիս գործողությունները հանգեցրել են Ադրբեջանում Վաշինգտոնի հեղինակության կորստի։ Ադրբեջանի Միլլի Մեջլիսը ևս մեկ անգամ հայտարարում է, որ Ադրբեջանը, հենվելով միջազգային իրավունքի նորմերի և սկզբունքների վրա, միշտ վճռականորեն կարձագանքի բոլոր բացասական քայլերին»,- ասվում է փաստաթղթում։
Հիշեցնենք, որ նոյեմբերի 16-ին ԱՄՆ Սենատն ընդունել է «Հայկական պաշտպանության ակտ» օրինագիծը, որի նպատակն է 2024 և 2025 թվականների համար չեղարկել «Ազատության աջակցության ակտի» 907-րդ հոդվածի (907-րդ բանաձև) ամենամյա չեղարկման նախագահական իրավասությունը, ինչի արդյունքում Ադրբեջանը կզրկվի ամերիկյան ռազմական օժանդակությունից։ Այն դեռևս պետք է ընդունվի Ներկայացուցիչների պալատի կողմից և ուղարկվի ԱՄՆ նախագահի ստորագրմանը։
Էմմա Չոբանյան
