Թուրքիայի ԱԺ-ում իշխող դաշինքը դեմ է քվեարկել Դինքի սպանության խորհրդարանական հետաքննության առաջարկին

Թուրքիայի Ազգային մեծ ժողովի իշխող «Արդարություն և զարգացում» (AKP) և «Ազգայնական շարժում» կուսակցության (MHP) օրենսդիրները (կազմում են նախագահ Ռեջեփ Թայիփ Էրդողանի իշխող դաշինքը) դեմ են քվեարկել պոլսահայ լրագրող Հրանտ Դինքի սպանության հարցով խորհրդարանական հետաքննություն անցկացնելու առաջարկին, գրում է Duvar-ը։

Առաջարկը ներկայացվել է ընդդիմադիր Ժողովրդական հավասարության և ժողովրդավարության կուսակցության (HEDEP) կողմից՝ մեկ օր անց այն բանից հետո, երբ Դինքի մարդասպան Օգյուն Սամասթը վաղաժամ ազատ է արձակվել։

HEDEP-ի պատգամավոր Զուլքյուֆ Ուչարն ասել է, որ Սամասթի ազատ արձակումը «մեկ այլ հարված» է հասցրել երկրում արդարադատության հավատքին:

Մեկնաբանելով առաջարկը՝ ընդդիմադիր SAADET կուսակցության պատգամավոր Սեմա Սիլկին Ունը հիշեցրել է, որ Հրանտ Դինքի գործը «կորել է Անկարայի միջանցքներում, ինչպես նախկինում», այսինքն՝ սպանության հրահրողները չեն հայտնաբերվել։

Մեկ այլ ընդդիմադիր՝ Ժողովրդահանրապետական կուսակցության պատգամավոր Հասան Բալթաջըն էլ ասել է, որ «Դինքի սպանությունը քաղաքական է»։

«Մի անգամ մեղադրեցին Էրգենեկոնին (Դինքի սպանության մեջ), հետո մեղադրեցին Գյուլենի ցանցին: Հրանտ Դինքի սպանությունն իրականում կազմակերպվել է նոր ռեժիմի կառուցման համար։ Սահմանադրական դատարանը փակելու այսօրվա փորձը և Հրանտ Դինքի մարդասպանին ազատ արձակելը ռեժիմի վերականգնման գործընթացում քայլեր են»,- հավելել է պատգամավորը։

Խորհրդարանում հնչած ելույթներից հետո ԱԶԿ-ի և «Ազգայնական շարժման» պատգամավորները դեմ են քվեարկել առաջարկին։

Հիշեցնենք, որ պոլսահայ լրագրող, «Ակոս» թերթի գլխավոր խմբագիր Հրանտ Դինքին սպանած Օգյուն Սամասթը նոյեմբերի 15-ին պայմանական վաղաժամկետ ազատ է արձակվել բանտից «լավ վարքի» համար։

Էմմա Չոբանյան