Քաղաքականություն
16.11.2023 | 23:19
ԱՄՆ Նյու Յորք նահանգի իշխանությունները զովացուցիչ ըմպելիքների և խորտիկների արտադրող PepsiCo ընկերությանը մեղադրել են Բուֆալո գետն աղտոտելու, բնակիչներին, ինչպես նաև կենդանիների և բույսերի կյանքին վնաս հասցնելու համար: Գլխավոր դատախազ Լետիտիա Ջեյմսի կողմից նահանգի Գերագույն դատարան ներկայացված հայցի համաձայն՝ ուսումնասիրությունները ցույց են տվել, որ PepsiCo-ն գետն ու դրա ափերն ամենամեծ աղտոտողն է:
Դատախազների տվյալներով՝ PepsiCo-ն արտադրում և փաթեթավորում է առնվազն 85 տեսակի ըմպելիք և 25 տեսակի նախուտեստ, որոնց մեծ մասի համար օգտագործվում է մեկանգամյա օգտագործման պլաստիկ։ Հայցվորը նշում է, որ անցյալ տարի մասնագետները հետազոտել են Բուֆալո գետի ափերը և հավաքել գրեթե 2 հազար կտոր պլաստիկի թափոն, որոնց վրա կարելի է տեսնել արտադրողների ապրանքանիշերը։ Դրանց 17%-ը կրում է PepsiCo նշանը։ Ի դեպ, գետն աղտոտող այլ գործոնների թվում նշվում են McDonald’s և Hershey’s ընկերությունները։
Բացի այդ, համանուն գետի վրա գտնվող Բուֆալո քաղաքի ջրամատակարարման համակարգում խմելու ջրի նմուշները ցույց են տվել միկրոպլաստիկի մասնիկների առկայություն։ Նման մասնիկների ընդունումը «կարող է էական վնաս հասցնել մարդու առողջությանը՝ սկսած վերարտադրողական ֆունկցիայի խանգարումից մինչև աղիքային բորբոքում և նեյրոտոքսիկ խանգարումների զարգացում»։
Հայցվորը պահանջում է, որ դատարանը պարտադրի PepsiCo-ին միջոցներ ձեռնարկել տարածքը մաքրելու և գետի ու դրա ափերի աղտոտումը դադարեցնելու համար։ Ընկերությունը նաև պետք է սպառողներին ուսուցանի պլաստիկի միջոցով աղտոտված բնությանը պատճառած վնասի մասին, համապատասխան նախազգուշացումներ տեղադրի արտադրանքի պլաստիկ փաթեթավորման վրա և փոխհատուցի այդ տարածքների բնակիչներին վնասների համար:
Դատախազությունը նաև կոչ է անում ընկերության նկատմամբ տուգանք սահմանել այն չափով, որքանով դատարանը նպատակահարմար կհամարի։
