Հասարակություն
27.07.2018 | 16:51
Հատուկ քննչական ծառայությունը նախաքննության անհրաժեշտ պայմաններից ելնելով չի կարող հրապարակել այն մարդկանց անունները, որոնք «Մարտի 1»-ի գործով մոտ ապագայում կկանչվեն հարցաքննության։ Այս մասին Factor.am-ին փոխանցեց Հատուկ քննչական ծառայության մամուլի խոսնակ Մարինա Օհանջանյանը։
Հարցին՝ հնարավոր է արդյոք, որ կայացվի ՀՀ 3-րդ նախագահ Սերժ Սարգսյանին և «Մարտի 1-ին» գաղտնի հրամանով կազմավորված շտաբի այլ անդամների հարցաքննելու որոշում, Մարինա Օհանջանյանը պատասխանեց․ «Նախաքննական մարմինն այդ մասին նախապես չի կարող հրապարակել»։
Հիշեցնեք որ, ըստ մամուլի հրապարակումների և իրավապաշտպանների զեկույցների, 2008թ․ մարտի 1-ին գործել է հատուկ շտաբ, որի կազմում են եղել Ռոբերտ Քոչարյանը, նախկին վարչապետ Սերժ Սարգսյանը, ԱԺ նախկին նախագահ Տիգրան Թորոսյանը, ՀՀ ԶՈՒ գլխավոր շտաբի պետի նախկին տեղակալ Յուրի Խաչատուրովը, ՀՀ նախկին գլխավոր դատախազ Աղվան Հովսեփյանը, ՀՀ պաշտպանության նախկին նախարար Միքայել Հարությունյանը, ՀՀ Ներքին զորքերի նախկին հրամանատար Գրիգոր Գրիգորյանը, ՀՀ ԶՈՒ գլխավոր շտաբի նախկին պետ Սեյրան Օհանյանը, Ազգային անվտանգության ծառայության նախկին պետ Գորիկ Հակոբյանը, ՍԴ նախկին նախագահ Գագիկ Հարությունյանը, ՀՀ Ռազմական ոստիկանության նախկին պետ Վլադիմիր Գասպարյանը, ՀՀ նախկին ոստիկանապետ Հայկ Հարությունյանը։
