16.12.2025 | 14:02
ԿԲ նախագահ Մարտին Գալստյանի ասուլիսը. ՈՒՂԻՂ
Գազայի խաղաղ բնակիչները կանգնած են չվերջացող մարդասիրական մղձավանջների առաջ․ ՄԱԿ-ի գլխավոր քարտուղար
Քաղաքականություն
10.11.2023 | 22:44
ՄԱԿ-ի գլխավոր քարտուղար Անտոնիո Գուտերեշը Գազայի հատվածում իրավիճակը բնութագրել է որպես «երբեք չվերջացող մարդասիրական մղձավանջ խաղաղ բնակչության համար»։ Նա ևս մեկ անգամ կրկնել է անհապաղ հրադադարի կոչը, գրում է CNN-ը։
«Նրանց թաղամասերը ոչնչացվել են: Նրանց սիրելիները սպանվել են: Ռումբեր են թափվում, մինչդեռ նրանց մերժում են կյանքի կենսական միջոցների հասանելիությունը՝ սնունդ, ջուր, դեղորայք, էլեկտրականություն»,- ասել է Գուտերեշը տեսաուղերձում, որը հեռարձակվել է Փարիզում տեղի ունեցած Գազայի հատվածի քաղաքացիական բնակչության համար միջազգային մարդասիրական համաժողովին:
Նա նաև ասել է, որ օգնության ծավալը «կաթիլ է օվկիանոսում» և նշել, որ միջազգային հանրությունը պետք է քայլեր ձեռնարկի պաշտպանելու խաղաղ բնակիչներին՝ կոչ անելով երկրներին ներդնել 1,2 միլիարդ դոլար ՄԱԿ-ի մարդասիրական օգնության համար։
«Մենք կարող ենք օգնել Գազայի խաղաղ բնակիչներին տեսնել վերջապես առնվազն հույսի մի շող՝ համերաշխության նշան, և ազդանշան, որ աշխարհը տեսնում է նրանց դժբախտությունը և բավականաչափ հոգ է տանում՝ գործելու համար»,- ասել է Գուտերեշը։
Համաժողովին ներկա է եղել ՄԱԿ-ի մարդասիրական օգնության համակարգող Մարտին Գրիֆիթսը, որը մտահոգություն է հայտնել հազարավոր մարդկանց «անվտանգ գոտիներ» ուղարկելու ցանկացած առաջարկի վերաբերյալ։ Նա նաև մտահոգություն է հայտնել «անվտանգ գոտու» պայմանների վերաբերյալ՝ ասելով, որ «Գազայի հատվածում ոչ մի տեղ ապահով կացարան, սնունդ, ջուր, սանիտարական պայմաններ և առողջապահություն ապահովելու համար բավարար պայմաններ չկան»։
Էմմա Չոբանյան
