«Մոռացվող» Եռաբլուրը․ ինչու Փաշինյանն ու այլ պաշտոնյաներ չեն այցելել զինվորների շիրիմների. ՏԵՍԱՆՅՈՒԹ

Նիկոլ Փաշինյանն այսօր «Եռաբլուր» չի այցելել․ զինվորական պանթեոնը դատարկ էր՝ կառավարական պատվիրակությունը 44-օրյա պատերազմի ավարտի երրորդ տարելիցին չէր եկել հարգանքի տուրք մատուցելու հարենիքի համար զոհվածների հիշատակին։

Նիկոլ Փաշինյանը նաև ուղերձով չդիմեց հայ ժողովրդին։ Փաշինյանն իր իշխանության օրոք զոհվածների հիշատակը մեկ րոպե լռությամբ հարգեց Կառավարության նիստի ժամանակ․ այս օրը համընկել էր գործադիրի հերթական նիստի հետ։

Հայաստանի ղեկավարը վերջին անգամ զինվորական պանթեոն այցելել է 10 ամիս առաջ՝ հունվարի 28-ին, ՀՀ բանակի կազմավորման օրը։ Այս տարի Նիկոլ Փաշինյանը ո՛չ սեպտեմբերի 21-ին՝ ՀՀ անկախության օրը, ո՛չ էլ սեպտեմբերի 27-ին՝ 44-օրյա պատերազմի մեկնարկի օրը, չի գնացել «Եռաբլուր»: Նախորդ տարի ևս սեպտեմբերի 27-ին և նոյեմբերի 9-ին այցեր չեն եղել, իսկ սեպտեմբերի 21-ի այցն ավարտվեց սկանդալով։

Իրավապաշտպանների գնահատմամբ՝ աննախադեպ ճնշում գործադրվեց Փաշինյանի ճանապարհը փակած զոհերի ծնողների նկատմամբ։ Այդ օրը ուժային կառույցներից, թերևս, միայն Զինված ուժերի ներկայացուցիչները չէին եկել Փաշինյանի մուտքը «Եռաբլուր» ապահովելու համար։

Իսկ այսօր, երբ ճանապարհին խոչընդոտներ, իսկ խոչընդոտները վերացնելու համար ոստիկանական զորքեր բերելու անհրաժեշտություն չկար, ինչո՞ւ Նիկոլ Փաշինյանի չէր եկել հարգանքի տուրք մատուցելու։ Factor TV-ն արձանագրեց, որ ՀՀ վարչապետի, ինչպես նաև նախագահի և ԱԺ նախագահի անուններից ծաղկեպսակներ չկան դրված զոհված ազատամարտիկների հիշատակը հավերժացնող հուշահամալիրին։

Զինվորների իրավունքների պաշտպանությամբ զբաղվող Ժաննա Ալեքսանյանը նոյեմբերի 9-ը հայ ժողովրդի համար ծանր օր է համարում։ Իրավապաշտպան խոսքով՝ Նիկոլ Փաշինյանը պարտավոր էր այցելել իր մեղքով զոհվածների շիրիմներին։

Պատերազմից մեկ տարի անց՝ 2021-ի սեպտեմբերի 27-ին Փաշինյանն առանց թիմակիցների՝ անվտանգության մեծաթիվ աշխատակիցներով շրջապատված գնացել էր «Եռաբլուր» և ծնկի էր գալիս զոհվածների շիրիմներին։ Ինչո՞ւ այժմ նման տեսարանների ականատես չենք լինում։

Տիկնիկային թատրոնի գեղարվեստական ղեկավար Ռուբեն Բաբայանը հակված չէ կարծել, որ երկրի ղեկավարի ու այլ պաշտոնյաների չայցելելով այդ տղաների սխրանքը մոռացության կմատնվի։ Նա հիշեցնում է նախադեպ Խորհրդային միության տարիներից, երբ կենտրոնական իշխանություններն ընդհանրապես արգելել էին եղեռնի մասին խոսել, բայց հայ ժողովուրդը չմոռացավ։

Թե ինչո՞ւ Նիկոլ Փաշինյանը չի այցելում «Եռաբլուր», Factor TV-ն փորձեց մեկնաբանություն ստանալ Կառավարությունից, սակայն, վարչապետի աշխատակազմից արձագանք չեղավ։

Մանրամասները՝ տեսանյութում։

Նարեկ Կիրակոսյան