26.06.2026 | 04:58
ԱԱ-2026. Նիդերլանդներն ու Ճապոնիան դուրս եկան փլեյ-օֆֆ. ՏԵՍԱՆՅՈՒԹ
Բրիտանական նավթային ընկերությունը ֆինանսավորել է Ղարաբաղի հայերի դեմ ռազմական ագրեսիան․ Guardian
Քաղաքականություն
09.11.2023 | 22:18
Ադրբեջանում British Petrolium-ի (BP) հանածո վառելիքի նախագծերն օգնել են ֆինանսավորել ռազմական ագրեսիան Ղարաբաղի հայերի դեմ՝ Ադրբեջանի կառավարությանը միլիարդավոր դոլարներ փոխանցելով, պնդում է Global Witness-ը, գրում է The Guardian-ը:
Global Witness-ը նշում է, որ բրիտանական նավթային ընկերության կողմից շահագործվող երկու խոշոր նավթագազային նախագծերում Ադրբեջանի մասնաբաժինը 2020 թվականից ի վեր՝ Լեռնային Ղարաբաղում պատերազմի բռնկումից հետո, ավելի քան չորս անգամ գերազանցել է իր ռազմական ծախսերը։
ՀԿ-ի վերլուծությունը ցույց է տվել, որ Ադրբեջանի տնտեսական կախվածությունը BP-ից՝ իր ամենամեծ օտարերկրյա ներդրողից, անուղղակիորեն օգնել է ֆինանսավորել վիճելի տարածաշրջանում էթնիկ հայերի դեմ Ադրբեջանի ռազմական ագրեսիան, որը ստիպել է ավելի քան 100,000 մարդու լքել տարածքը սեպտեմբերի սկզբից:
Նույն ամսին BP-ն ներկայացնող բարձրաստիճան դեմքեր, այդ թվում՝ դրա նախագահ Հելգե Լունդը և նախկին գործադիր տնօրեն Ջոն Բրաունն այցելել են Բաքու՝ մասնակցելու Ադրբեջանի նախկին նախագահ Հեյդար Ալիևի ծննդյան 100-ամյակին նվիրված տոնակատարություններին և վերահաստատել «Ադրբեջանի հետ երկարաժամկետ գործընկերության» իրենց հանձնառությունը», ասված է ընկերության հաղորդագրության մեջ։
BP-ն 2020 թվականից Բաքվին մատակարարել է գրեթե 35 մլրդ դոլար արժողությամբ նավթ և գազ՝ համաձայն «արտադրության բաշխման համաձայնագրի»:
The Guardian-ը հիշեցնում է, որ Իլհամ Ալիևը նախագահ է դարձել իր հոր մահից հետո՝ 2003 թվականին, մի ընտրությունների արդյունքում, որոնք, Եվրոպայի անվտանգության և համագործակցության կազմակերպության դիտորդների պնդմամբ, չեն համապատասխանել միջազգային չափանիշներին:
«BP-ի երկարամյա համագործակցությունն Ալիևի բռնապետության հետ ֆինանսավորել է Ադրբեջանի ռազմականացումը և ագրեսիան Հայաստանի դեմ։ BP-ն ուրախ է շարունակել հորատումը՝ ոչինչ չսովորելով Ռուսաստանում կատարած պատմական սխալից»,- ասել է Դոմինիկ Իգլթոնը՝ Global Witness-ի ավագ աշխատակիցը:
Պարբերականը հիշեցնում է, որ BP-ն ստիպված եղավ հրաժարվել ռուսական «Ռոսնեֆտ» նավթային ընկերության գրեթե 20% բաժնետոմսերից շուրջ 24 միլիարդ դոլար արժողությամբ՝ Կրեմլի՝ Ուկրաինա ներխուժումից հետո, երբ Մեծ Բրիտանիայի կառավարությունը մտահոգություն հայտնեց ընկերության հետ BP-ի կապերի վերաբերյալ։
«Բռնակալներին ֆինանսավորելը միշտ էլ վատ ռազմավարություն է»,- եզրափակել է Իգլթոնը:
