Թուրքիան ճգնաժամի ֆոնին տարեվերջին գնաճի կանխատեսումը բարձրացրել է մինչև 65 տոկոսի

Թուրքիայի Կենտրոնական բանկը տարեկան գնաճի կանխատեսումը 58 տոկոսից բարձրացրել է մինչև 65 տոկոսի։ Այս մասին հայտարարել է բանկի ղկավար Գայե Էրքանը՝ վկայակոչելով համաշխարհային տնտեսական ակտիվության թուլացումը և նավթի գների աճի տատանումները, գրում է Al Monitor-ը։

Բացահայտելով բանկի միջնաժամկետ կանխատեսումները՝ Էրքանն ասել է, որ վերանայել է տարեկան գնաճի կանխատեսումները մինչև 65%, 36% և 14%, համապատասխանաբար, 2023, 2024 և 2025 թվականների համար:

«Համաշխարհային տնտեսական ակտիվության թուլացումը, նավթի գների աճող անկայունությունը, այն ակնկալիքը, որ դրամավարկային քաղաքականությունը երկար ժամանակ սահմանափակող կմնա, և կապիտալի արտահոսքը ռիսկեր է ստեղծում գնաճի հեռանկարի համար նաև Թուրքիայում»,- ասել է նա՝ նշելով, որ տարեկան գնաճի գագաթնակետը կգրանցվի 2024 թվականի մայիսին՝ բնական գազի գներից բխող բազային ազդեցությունների պատճառով։

Թուրքիայում տարեկան գնաճը կրկին սկսել է ավելանալ հուլիսին՝ ութամսյա նվազման միտումից հետո և սեպտեմբերին հասել է 61,5 տոկոսի։

Նախորդ նվազման միտումը մեծապես պայմանավորված էր անցյալ տարվա համապատասխան ամիսների բարենպաստ բազային էֆեկտով, քանի որ երկրի տարեկան գնաճը 2022 թվականի հոկտեմբերին հասել է 24 տարվա առավելագույնին՝ 85,5 տոկոսի:

Թուրքիայի կտրուկ գնաճն ավելացել է նախագահ Ռեջեփ Թայիփ Էրդողանի՝ տոկոսադրույքները ցածր պահելու ոչ ավանդական տնտեսական քաղաքականության ֆոնին, չնայած բարձր գնաճին: Տնտեսագետների մեծ մասը, ներառյալ՝ Էրքանը, կարծում են, որ տոկոսադրույքների բարձրացումը գնաճը զսպելու լավագույն միջոցն է: Էրդողանի ազդեցության տակ գործող Կենտրոնական բանկի նախկին վարչակազմն իջեցրել էր տոկոսադրույքները՝ առաջացնելով թուրքական լիրայի արագ անկումը։

Մայիսին կայացած համընդհանուր ընտրություններից հետո տեղի ունեցած մեծ շրջադարձի ժամանակ Էրդողանը հրաժարվեց իր սովորական տնտեսական քաղաքականությունից և տնտեսության ոլորտում ղեկավարներ նշանակեց առաջատար տնտեսագետներ Էրքանին և ֆինանսների նախարար Մեհմեդ Շիմշեքին:

Էմմա Չոբանյան