18.03.2026 | 23:19
1-ամյա երեխայի սպանության փորձ կատարելու մեջ մեղադրվող խորթ մայրը կալանավորվեց
Տնտեսական ճգնաժամի ֆոնին Թուրքիան մասնավորեցնելու է հիմնական ենթակառուցվածքները
Քաղաքականություն
02.11.2023 | 23:30
Թուրքիայի ֆինանսների նախարար Մեհմեթ Շիմշեքը հայտարարել է, որ մտադրություն կա սեփականաշնորհել որոշ հիդրոէլեկտրակայաններ և հողատարածքներ, որոնք պատկանում են Էլեկտրաէներգիայի արտադրության պետական կորպորացիային (EÜAŞ), ինչպես նաև մի շարք նավահանգիստներ, մայրուղիներ և կամուրջներ, գրում է Turkish Minute-ը։
Նշենք, որ EÜAŞ-ըն արտադրում է Թուրքիայի էլեկտրաէներգիայի 20 տոկոսը։
Նախարարն այս հայտարարություններն արել է խորհրդարանի նիստի ժամանակ, որը նվիրված է եղել նախարարության 2024 թվականի բյուջեին: Շիմշեքը չի հստակեցրել, թե որ ակտիվներն են ներառվելու սեփականաշնորհման ծրագրում, միայն հայտարարել է, որ նոր ակտիվներ չեն նախատեսվում ավելացնել այդ շրջանակում։
Հայտարարությունը սուր քննադատության է արժանացել ընդդիմադիր պատգամավորների կողմից:
«Ի՞նչ է մնացել, որ դեռ չեք վաճառել։ Ինչ ունենք, արդեն ծախել եք»,- նիստի ժամանակ հայտարարել են ընդդիմադիրները։
Մտահոգություններ են առաջացել նաև վճարների վրա հնարավոր ազդեցության վերաբերյալ, եթե սեփականաշնորհվեն հիմնական ենթակառուցվածքները, ինչպիսիք են Ստամբուլ-Անկարա մայրուղին և Ստամբուլի Բոսֆորի կամուրջը: Երկուսն էլ ի սկզբանե ֆինանսավորվել են պետական միջոցներից և առաջարկում են ավելի ցածր վճարներ՝ մասնավոր կառավարվող այլընտրանքների հետ համեմատ: Սեփականաշնորհումը կարող է հանգեցնել վճարների զգալի աճի՝ ազդելով ամենօրյա ուղևորների և առևտրային տրանսպորտի վրա:
Ֆինանսների նախարարի այս հայտարարությունը հաջորդում է նախորդ սեփականաշնորհումներին, որոնք քննարկումներ էին բորբոքել Թուրքիայի տնտեսության մեջ պետական և մասնավոր հատվածների դերի մասին:
Առաջարկվող մասնավորեցումը տեղի է ունենում քաղաքացիների վրա աճող ֆինանսական բեռի հետ կապված ավելի լայն մտահոգությունների ֆոնին, քանի որ երկրում պաշտոնական տարեկան գնաճի մակարդակն անցյալ տարվա հոկտեմբերին հասել էր 85 տոկոսի և անցյալ ամիս կրկին բարձրացել՝ հասնելով 60 տոկոսից բարձր մակարդակի։
Էմմա Չոբանյան
