Գերմանիան Երևանի և Բաքվի միջև Շառլ Միշելի միջնորդությամբ բանակցությունների կոչ է անում

Գերմանիայի ԱԳ նախարար Անալենա Բերբոքի՝ նոյեմբերի 3-4-ը Երևան և Բաքու այցերի կապակցությամբ ադրբեջանական լրատվամիջոցները դիմել են Ադրբեջանում գերմանական դեսպանատանը՝ լրացուցիչ մանրամասների համար։

Նշվում է, որ սա Գերմանիայի արտգործնախարարի առաջին այցն է Հայաստան և Ադրբեջան, և երկրորդը Հարավային Կովկաս՝ 2023 թվականի գարնանը Վրաստան կատարած այցից հետո։

«Գերմանիան ձգտում է կայուն խաղաղության, տարածաշրջանի քաղաքական և տնտեսական դիվերսիֆիկացման ու Եվրամիության հետ սերտ հարաբերությունների: Նպատակը հանդիսանում է բանակցությունների միջոցով  համապարփակ խաղաղ կարգավորումը, որ հայերն ու ադրբեջանցիները կարողանան ապրել խաղաղության ու անվտանգության մեջ իրենց ազգային սահմաններում։ Այդ նպատակով մենք աջակցում ենք եռակողմ բանակցությունների արագ վերսկսմանը Եվրամիության խորհրդի նախագահ Շառլ Միշելի միջնորդությամբ և աջակցում ենք ցանկացած հարաբերություն, որը նպաստում է Հարավային Կովկասի ժողովուրդների խաղաղությանը և կայունությանը»,- ասվում է  Գերմանիայի դեսպանատան հայտարարության մեջ։

Նշվում է, որ Բերբոքը Բաքվում բանակցություններ է անցկացնելու Ադրբեջանի ԱԳ նախարար Ջեյհուն Բայրամովի հետ, որից հետո տեղի է ունենալու մամուլի ասուլիս։

Վաղը՝ նոյեմբերի 3-ին, Գերմանիայի ԱԳ նախարարը ժամանելու է Երևան։ Նա հանդիպելու է ՀՀ ԱԳ նախարար Արարատ Միրզոյանին։

Ինչ վերաբերում է Շառլ Միշելի միջնորդությամբ բանակցություններին, հիշեցնենք, որ եվրոպական հարթակի բանակցությունները մերժում է Բաքուն, որը հրաժարվել է մասնակցել հոկտեմբերին նախատեսված երկու հանդիպումներին։

Էմմա Չոբանյան