Բոլիվիան խզել է դիվանագիտական հարաբերությունները Իսրայելի հետ, լատինամերիկյան մի շարք երկրներ դեսպաններին են հետ կանչել Թել Ավիվից

Բոլիվիան խզել է դիվանագիտական հարաբերությունները Իսրայելի հետ Գազայում պատերազմի պատճառով, Լատինական Ամերիկայի երկու այլ երկրներ էլ հետ են կանչել Թել Ավիվում իրենց դեսպաններին խորհրդակցությունների համար, գրում է Al Jazzira-ն։ Հարավամերիկյան երկիրը մեղադրում է Իսրայելին Գազայի հատվածում մարդկության դեմ հանցագործությունների մեջ։ Այս մասին  մամուլի ասուլիսի ժամանակ հայտարարել է երկրի փոխարտգործնախարար Ֆրեդի Մամանին։ Ըստ նրա՝ Բոլիվիան որոշել է խզել դիվանագիտական հարաբերությունները Իսրայելի հետ՝ «մերժելով և դատապարտելով Գազայի հատվածում տեղի ունեցող իսրայելական ագրեսիվ և անհամաչափ ռազմական հարձակումը»։ Բոլիվիան Իսրայելի հետ հարաբերությունները խզել էր 2009 թվականին, սակայն դրանք վերականգնել էին 2020 թվականին։ Բոլիվիան նաև մտադիր է մարդասիրական օգնություն ուղարկել Գազա։

Հարևաններ երկրները՝ Կոլումբիան և Չիլին էլ  հետ են կանչել իրենց դեսպաններին խորհրդակցությունների համար  և հրադադարի կոչեր արել։

Իր հերթին Չիլիի նախագահ, ձախ քաղաքական գործիչ Գաբրիել Բորիչը հայտարարել է, որ իր երկիրը «Գազայի հատվածում Իսրայելի կողմից միջազգային մարդասիրական իրավունքի խախտումների պատճառով» հետ է կանչում Իսրայելից իր դեսպանին խորհրդակցությունների համար։
«Չիլին խստորեն դատապարտում է այս ռազմական գործողությունները և մեծ մտահոգությամբ է հետևում դրանց», – գրել է Բորիչը X իր միկրոբլոգում։
Չիլիից անմիջապես հետո Լատինական Ամերիկայի մեկ այլ երկիր՝ Կոլումբիան, հայտարարեց Իսրայելից իր դեսպանին հետ կանչելու մասին։ Այս որոշումը X ցանցում հայտնել է Կոլումբիայի նախագահ Գուստավո Պետրոն։
«Ես որոշել եմ հետ կանչել Իսրայելում մեր դեսպանին։ Եթե Իսրայելը չդադարեցնի պաղեստինցի ժողովրդի զանգվածային սպանությունը, մենք չենք կարողանա այնտեղ մնալ»,– Կոլումբիայի նախագահի խոսքերն է մեջբերում Reuters-ը։