15.09.2026 | 18:30
«Դաշնակցական բոլշևիզմ»-ից մինչև «ՀՀՇ-ի ծիլեր». գաղափարախոսական պարադոքս՝ ԱԺ-ում. ՏԵՍԱՆՅՈՒԹ
Իսրայելը հարվածել է Գազայում Ջաբալիա փախստականների ճամբարին
Քաղաքականություն
01.11.2023 | 11:12
Գազայի հատվածի հյուսիսում գտնվող Ջաբալիա փախստականների ճամբարին Իսրայելի օդային հարվածի հետևանքով զոհվել է առնվազն 47 մարդ։ Պաղեստինյան Կարմիր Խաչի ներկայացուցիչները հաստատել են, որ փլատակներից դուրս են բերել 25 խաղաղ բնակիչների դի, գրում է BBC-ի ռուսական ծառայությունը։
ՀԱՄԱՍ-ի կողմից վերահսկվող Գազայի առողջապահության նախարարությունը հայտնել է 50 զոհի և 150 վիրավորի մասին։
Իր հերթին, իսրայելական բանակը հայտարարել է, որ հարվածը սպանել է ՀԱՄԱՍ-ի բարձրաստիճան հրամանատարի և ոչնչացրել «ստորգետնյա ահաբեկչական ենթակառուցվածքը»։ Իսրայելի պաշտպանության բանակի հայտարարության մեջ ասվում է նաև, որ հրամանատարի հետ սպանվել են բազմաթիվ մարտիկներ։
Reuters-ի լուսանկարներում երևում է, որ ճամբարին մեծ վնաս է հասցվել, ավերվել է մի քանի բնակելի շենք՝ խիտ բնակեցված տարածքի կենտրոնում։
AFP-ի թղթակիցն այցելել է Ջաբալիայում պայթյունի վայր։ Գործակալությունը նշում է, որ առնվազն 47 մարդու դի է դուրս բերվել ավերված շենքերի փլատակներից: Ճամբարը գտնվում է Գազա քաղաքի հյուսիսային մասում․ այն փախստականների ութ ճամբարներից ամենամեծն է: Այն զբաղեցնում է ընդամենը 1,4 քառակուսի կմ տարածք, բայց խիտ բնակեցված է։ ՄԱԿ-ի տվյալներով՝ 2023 թվականի հուլիսի դրությամբ այնտեղ գրանցված է եղել 116 հազար պաղեստինցի փախստական։
