Քաղաքականություն
31.10.2023 | 21:06
Ադրբեջանի փոխվարչապետ Շահին Մուստաֆաևն աշխատանքային այցով Ռուսաստանում է։ Ռուսական կողմի հաղորդագրության համաձայն՝ այցի շրջանակում նա հանդիպել է Ռուսաստանի առաջին փոխվարչապետ Անդրեյ Բելոուսովին։
«Զրույցի ընթացքում քննարկվել են «Հյուսիս-Հարավ» միջազգային տրանսպորտային միջանցքի երկաթուղային ուղու զարգացման հարցերը»,- ասվում է հաղորդագրության մեջ։
Հիշեցնենք, որ այս տարվա մայիսին ՌԴ նախագահ Վլադիմիր Պուտինն ու Իրանի նախագահ Էբրահիմ Ռաիսին տեսակապով մասնակցել էին Ռեշտ-Աստարա երկաթուղու հատվածի կառուցման համաձայնագրի ստորագրման արարողությանը։
Նախագծում ներգրավված է երեք երկիր՝ ՌԴ-ն, Իրանն ու Ադրբեջանը։ Ուկրաինայում պատերազմի մեկնարկից ի վեր ՌԴ-ն մեծ ջանքեր է գործադրում երկաթգծի կառուցումն ու «Հյուսիս-Հարավ» միջանցքի այս ուղղությունը կյանքի կոչելու համար։ ՌԴ պաշտոնյաները տարբեր մակարդակներով պարբերաբար Ադրբեջանի իրենց գործընկերների հետ այս ճանապարհի հարցն են քննարկում։
Հավելենք նաև, որ Բելոուսովն իր հերթին հոկտեմբերի սկզբին աշխատանքային այցով Բաքվում էր։
Էմմա Չոբանյան
