15.12.2025 | 16:34
Էդուարդ Սպերցյանը հավակնում է լավագույն ֆուտբոլիստի կոչմանը
Եգիպտոսը հրաժարվում է ընդունել Գազայի հատվածի բնակիչներին
Քաղաքականություն
31.10.2023 | 20:57
Եգիպտոսի վարչապետ Մուստաֆա Մադբուլին հաստատել է, որ երկիրը հրաժարվում է ընդունել Գազայի հատվածի բնակիչներին Սինայի թերակղզում։ Այս մասին նա հայտարարել է Էլ-Արիշ քաղաքում Հյուսիսային Սինայի երեցների հետ հանդիպմանը, գրում է Կոմերսանտը։
«Ինչպես նախագահ Աբդել Ֆաթահ աս-Սիսին է ասել՝ Եգիպտոսը թույլ չի տա, որ մեզ ինչ-որ բան պարտադրեն կամ մեր հաշվին լուծվեն տարածաշրջանային խնդիրները»,- ասել է Մադբուլին։
Նա հավելել է, որ Եգիպտոսի իշխանություններն առաջիկա տարիներին կֆինանսավորեն թերակղզու վերակառուցումը և կընդլայնեն դրա զարգացման ծրագրերը, որ «ոչ ոք չմտածի, թե Եգիպտոսը կհրաժարվի Սինայից»։ Տարածքը պահպանելու համար, ըստ երկրի վարչապետի, երկիրը «պատրաստ է վճարել միլիոնավոր կյանքերով»։
Բանն այն է, որ ավելի վաղ Associated Press-ը հայտնել էր իսրայելական հետախուզության ծրագրի մասին, ըստ որի՝ ռազմական գործողությունների սկզբում Գազայի հատվածի խաղաղ բնակիչները պետք է տեղափոխվեին հյուսիսային Սինայի թերակղզի: Սկզբում նախատեսվում էր փախստականներին տեղավորել ժամանակավոր վրանային քաղաքներում, իսկ հետո դրանց փոխարեն մշտական քաղաքներ կառուցել։
Որպես Գազայի բնակիչների վերաբնակեցման այլ հնարավոր շրջաններ փաստաթղթում նշվում են Թուրքիան, Կատարը, Սաուդյան Արաբիան, Արաբական Միացյալ Էմիրությունները և Կանադան: Իսրայելացի մի պաշտոնյա, որը ծանոթ է հետախուզության ծրագրին, The Associated Press-ին ասել է, որ փաստաթուղթը պարտադիր չէ և չի քննարկվել անվտանգության պաշտոնյաների հետ:
Գազայի հատվածում Իսրայելի և ՀԱՄԱՍ խմբավորման միջև ռազմական գործողությունների սկզբից ի վեր զոհվել է ավելի քան 8 հազար մարդ, որոնց մոտ 70%-ը կանայք և երեխաներ են։ ՄԱԿ-ն աղետալի է համարում իրադրությունն անկլավում՝ ջրի, դեղորայքի և վառելիքի պակասի պատճառով։
