15.03.2026 | 12:48
Վթարային ջրանջատում Երևանում և Սյունիքում
Դավիթ Խաչատուրյանը չի մասնակցում ԲԴԽ նիստին
Հասարակություն
31.10.2023 | 12:06
Բարձրագույն դատական խորհրդում այսօր սկսվեց սնանկության դատարանի դատավոր Արտաշես Հովհաննիսյանի վերաբերյալ կարգապահական վարույթի քննությունը: ԲԴԽ նիստին չի մասնակցում գիտնական անդամ Դավիթ Խաչատուրյանը: Նիստը նախագահող Կարեն Անդրեասյանը հայտնեց, թե Խորհուրդն ինչ կազմով է քննում գործը, սակայն Խաչատուրյանի բացակայության հանգամանքին և դրա պատճառներին չանդրադարձավ:
Նշենք, որ ԲԴԽ-ն գործում է 5 դատավոր անդամի և 5 գիտնական անդամի կազմով: Դավիթ Խաչատուրյանը որպես գիտնական է ընտրվել ԲԴԽ անդամ, իսկ այժմ, փաստորեն, դատավոր է նշանակվել: Չի բացառվում, որ նրա բացակայությունը այս հանգամանքով պայմանավորված լինի, սակայն այս պահի դրությամբ Խաչատուրյանի` ԲԴԽ անդամի պաշտոնից հրաժարական տալու վերաբերյալ պաշտոնական տեղեկատվություն առկա չէ: ԲԴԽ լրատվական ծառայությունից հայտնեցին, որ պարզաբանում ստանանք Դավիթ Խաչատուրյանից, սակայն վերջինիս հետ այս պահին կապ հաստատել չի ստացվել:
Նիստին մասնակցում է ԲԴԽ անդամ Նաիրա Հովսեփյանը, որը երեկ` հոկտեմբերի 30-ին, նշանակվել է Վճռաբեկ դատարանի դատավոր: Հատկանշական է, որ Հովսեփյանն էլ որպես Երևանի ընդհանուր իրավասության դատարանի առաջին ատյանի դատավոր է ընտրվել ԲԴԽ կազմում, ուստի՝ ստացվում է, որ այժմ ԲԴԽ կազմում Վճռաբեկ դատարանից երկու ներկայացուցիչ կա` Նաիրա Հովսեփյանը և Քրիստինե Մկոյանը, իսկ Երևանի դատարանից ներկայացուցիչներ ընդգրկված չեն:
Արաքս Մամուլյան
