16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Նեթանյահուն հայտարարել է ռազմական գործողության երրորդ փուլի մեկնարկի մասին
Քաղաքականություն
31.10.2023 | 12:01
Իսրայելի պաշտպանության բանակը (IDF) սկսել է Գազայի հատվածում ՀԱՄԱՍ ահաբեկչական խմբավորման դեմ պատերազմի երրորդ փուլը, որը ներառում է ցամաքային ռազմական գործողության ընդլայնում, հայտարարել է Իսրայելի վարչապետ Բենիամին Նեթանյահուն, գրում է DW-ի ռուսական ծառայությունը։
«Մենք պատերազմի մեջ ենք: Մենք մեր առջև հստակ նպատակ ենք դրել՝ ոչնչացնել ՀԱՄԱՍ-ի ռազմական և վարչական ներուժը: Մենք դա անում ենք համակարգված․․․ Երրորդ փուլը Գազայի հատված ցամաքային ներթափանցման ընդլայնումն է: Իսրայելի պաշտպանության բանակը դա անում է չափված, շատ հզոր քայլերով, քայլ առ քայլ համակարգված առաջխաղացումով»,- ասել է վարչապետը:
Իր ուղերձում Նեթանյահուն ընդգծել է, որ Իսրայելի կողմից սկսված արշավը ժամանակ կպահանջի։ «Կլինեն անսպասելի խոչընդոտներ, կլինեն դժվարություններ, կլինեն կորուստներ, կլինեն անակնկալներ, բայց, ի վերջո, ես ձեզ մի բան եմ խոստանում՝ ՀԱՄԱՍ-ը կտապալվի, ՀԱՄԱՍ-ը կպարտվի, կլինի մեկ ուրիշ Գազա», – ասել է վարչապետը։
«Մենք փորձում ենք Գազայի բնակչությանը տեղափոխել հարավային հատված, ստեղծել ենք անվտանգ գոտի այնտեղ, որտեղ ցանկանում ենք հումանիտար օգնություն ուղարկել։ Մենք դա անում ենք մեր ամերիկացի ընկերների հետ համաձայնեցված։ Այս գործընթացը նույնպես ժամանակ է պահանջում»,- պարզաբանել է Իսրայելի վարչապետը։
Հոկտեմբերի 7-ին ՀԱՄԱՍ-ի զինյալները լայնածավալ ահաբեկչություն են իրականացրել Իսրայելի վրա և իրականացրել արդի իսրայելական պետության պատմության մեջ խաղաղ բնակչության ամենամեծ ջարդը։ Նախնական տվյալներով՝ զոհվել է ավելի քան 1400 մարդ։ Ահաբեկիչները նաև ավելի քան 200 պատանդ են վերցրել և տարել Գազայի հատված։
