10.04.2026 | 16:03
Խաղաղության կուսակցությունը մենք ենք, այդպիսին ենք եղել ի սկզբանե. Լևոն Զուրաբյան․ ՏԵՍԱՆՅՈՒԹ
Իսրայելը պահանջում է տարհանել Գազայի հատվածի հիվանդանոցները
Քաղաքականություն
30.10.2023 | 18:21
Իսրայելական բանակը կարծում է, որ Գազայի հիվանդանոցները ՀԱՄԱՍ-ի հրամանատարական կետերն են, և պահանջում է, որ դրանց անձնակազմն ու հիվանդները տարհանվեն։ Պաղեստինցի բժիշկները պատասխանում են, որ հիվանդներին տարհանելը կնշանակի սպանել նրանց, փոխանցում է Euronews-ը:
Խուճապ, փոշի և կոտրված ապակիներ. Կարմիր մահիկը հրապարակել է մի տեսանյութ, որն արվել է Գազայի Ալ-Քուդս հիվանդանոցում Իսրայելի բանակի հերթական ռմբակոծության ժամանակ:
Թել Ավիվը պնդում է, որ հիվանդանոցում է գտնվում ՀԱՄԱՍ-ի հրամանատարական կետերից մեկը և կոչ է անում անձնակազմին ու հիվանդներին տարհանել։ Գրոհայինները հերքում են դա, իսկ իրավապաշտպաններն ու կամավորներն ասում են, որ տարհանումն անհնար է:
«Մենք հնարավորություն չունենք տարհանել Ալ-Քուդսի հիվանդանոցը: Հիվանդանոցում ավելի քան 400 հիվանդ կա: Նրանցից շատերը գտնվում են վերակենդանացման բաժանմունքում: Նրանց տարհանելը կնշանակի սպանել նրանց: Մեր հիվանդանոցում կա ավելի քան 14000 խաղաղ մարդ, ովքեր ներքին տեղահանվածներ են մշտական ռմբակոծության պատճառով»,- ասել է Պաղեստինի Կարմիր մահիկի ընկերության խոսնակ Նեբալ Ֆարսահը։
Նմանատիպ իրավիճակ է նաև Գազայի մեկ այլ հիվանդանոցում՝ Ալ-Շիֆայում: Իսրայելական բանակը պնդում է, որ դրա շենքի տակ ՀԱՄԱՍ-ի բազա կա և պահանջում է տարհանել հաստատությունը: Հիվանդանոցի գլխավոր բժիշկ Մարվան Աբուսադան իրավիճակն անվանել է «աղետալի», իսկ տարհանումը՝ անհնար։ Նրա խոսքով՝ ներսում 55 հազար ներքին տեղահանվածներ կան, հիվանդները պառկած են միջանցքներում և զբաղեցնում են հիվանդանոցի «ամեն քառակուսի մետրը»։
Չկան բավարար հակաբիոտիկներ և ցավազրկողներ, իսկ որոշ վիրահատություններ կատարվում են առանց անզգայացման։
ԱՀԿ-ն ևս հայտարարել է հիվանդներին տարհանելու անհնարինության մասին։ Կազմակերպությունը կողմերին կոչ է արել անհապաղ դադարեցնել կրակը և Իսրայելից պահանջել է թույլատրել մարդասիրական մատակարարումները Գազա։
