Գերմանիայի ՊՆ ղեկավարը կոչ է արել Եվրոպայում պատերազմի նախապատրաստվել

Մերձավոր Արևելքում զինված հակամարտությունը և Ուկրաինա Ռուսաստանի ներխուժումը կարող են հանգեցնել պատերազմի Եվրոպայում։ ZDF-ին տված հարցազրույցում այս մասին ասել է Գերմանիայի պաշտպանության նախարար Բորիս Պիստորիուսը։

«Մենք պետք է նորից վարժվենք այն մտքին, որ Եվրոպայում կարող է պատերազմի վտանգ լինել», – ասել է նա:

Պաշտոնյան հավելել է, որ այս առումով Գերմանիան պետք է կարողանա պաշտպանել իրեն՝ դա վերաբերում է և՛ Բունդեսվերին, և՛ հասարակությանը։

«Մենք պետք է պատրաստ լինենք պատերազմի»,- ընդգծել է Պիստորիուսը։

ՊՆ ղեկավարը հերքել է այն մեղադրանքները, թե կառավարությունը շատ դանդաղ է արձագանքում նոր սպառնալիքներին։ Նա հիշեցրել է, որ վերակազմավորել է Բունդեսվերը։ Բացի այդ, որպես պատասխան Ուկրաինա Ռուսաստանի ներխուժման, ստեղծվել է 100 միլիարդ եվրո արժողությամբ հատուկ հիմնադրամ:

«Դա չի լինում ավելի արագ, քան հիմա»,- ընդգծել է նախարարը՝ հավելելով, որ Բունդեսվերի վիճակը «վաղուց անտեսված է եղել», և «այն ամենը, ինչ ավերվել է 30 տարում, չի կարող վերականգնվել 19 ամսում»։ Միևնույն ժամանակ, Պիստորիուսը խոստացել է, որ «մինչև այս տասնամյակի վերջը Գերմանիան բոլորովին այլ վիճակում կլինի»։

Ավելի վաղ նախարարը հիմնարար փոփոխություններ էր իրականացրել ՊՆ կառուցվածքում։ Մասնավորապես, նա կրճատել է ստորաբաժանման ղեկավարության թիվը 370-ից մինչև 160 աշխատակցի՝ կառավարումը պարզեցնելու և կրկնակի ենթակայությունը վերացնելու նպատակով։