07.10.2026 | 23:19
Հայաստանը ՄԱԿ-ում ընդգծել է զարգացող երկրների համար միջազգային աջակցության և ֆինանսավորման կարևորությունը
Ամբոխը փորձել է գրոհել Թել Ավիվից Մախաչկալա ժամանած ինքնաթիռը․ 20 մարդ է վիրավորվել, 60 ձերբակալված կա․ ՏԵՍԱՆՅՈՒԹ
Քաղաքականություն
30.10.2023 | 11:13
Հարյուրավոր մարդիկ են հավաքվել Մախաչկալայի օդանավակայանում Թել Ավիվ Մախաչկալա չվերթի ժամանումից առաջ։ Պաղեստինյան դրոշներ և ցուցապաստառներ կրող անձինք փորձել են ուժով ներթափանցել ինքնաթիռ, այնուհետև սկսել են ստուգել մեքենաները, որոնք դուրս էին գալիս օդանավակայանից՝ փնտրելով Իսրայելից փախստականների, հաղորդում է Baza-ն:
Ականատեսներից մեկը «Tut Dagestan» հեռագրային ալիքին պատմել է, որ մոտ հիսուն մարդ շրջապատել է իրեն՝ հարցնելով, թե արդյոք նա հրեա է։ Նրան թողել են հեռանալ միայն ռուսական անձնագիրը ցույց տալուց հետո։
Ոստիկանները ակտիվորեն չեն միջամտել ամբոխի գործողություններին՝ հորդորելով նրանց «չափավոր» պահել։ Այն բանից հետո, երբ ցուցարարները ներխուժել են թռիչքուղի, ժամանել են հատուկ ջոկատայիններ։ Բանակցությունների համար դեպքի վայր են ժամանել Դաղստանի ազգային քաղաքականության նախարար Էնրիկ Մուսլիմովը և երիտասարդության հարցերի նախարար Քամիլ Սաիդովը։
Քննչական կոմիտեն քրեական գործ է հարուցել ՌԴ ՔՕ 212 հոդվածի հատկանիշներով (զանգվածային անկարգություններ), որը նախատեսում է ազատազրկում՝ ութից տասնհինգ տարի ժամկետով։ Օդային տրանսպորտի դաշնային գործակալությունը ժամանակավորապես փակել է Մախաչկալայի օդանավակայանը մեկնումների և ժամանման համար։ Ինքնաթիռները ուղղորդվել են այլընտրանքային օդանավակայաններ։
Ինչպես հայտնում է ՌԻԱ Նովոստին, անկարգություններին մի քանի հարյուր մարդ է մասնակցել։ Ավելի ուշ Դաղստանի առողջապահության նախարարությունը հայտնել է, որ անկարգությունների ընթացքում տուժել է ավելի քան 20 մարդ։ Նրանցից 10-ը հոսպիտալացվել են, այդ թվում երկուսի վիճակը ծայրահեղ ծանր է։ Զոհերի թվում կան ինչպես քաղաքացիական անձինք, այնպես էլ ոստիկաններ։
ՌԲԿ-ի փոխանցմամբ էլ ՝ իրավապահները հայտնաբերել են անկարգությունների ավելի քան 150 մասնակցի, նրանցից 60-ը ձերբակալվել է։ Այս մասին հաղորդում է Հյուսիսային Կովկասի դաշնային օկրուգի ներքին գործերի նախարարության գլխավոր վարչությունը։
Նշվում է, որ «ապօրինի գործողությունների հետևանքով տուժել և տարբեր աստիճանի մարմնական վնասվածքներ է ստացել ոստիկանության ինը ծառայող, որոնցից երկուսը գտնվում են հիվանդանոցում»։
Միջադեպի տեսանյութը՝ այստեղ։
