Էրդողանի կողմից ՀԱՄԱՍ-ի պաշտպանությունը դաշնակից պետությունների զայրույթը և քննադատությունն է հարուցել

Թուրքիայի նախագահ Ռեջեփ Թայիփ Էրդողանի վերջին հայտարարությունները, որոնք պաշտպանում են ՀԱՄԱՍ-ին՝ կազմակերպության զինյալներին բնորոշելով որպես «ազատարարներ», բազմաթիվ արձագանքներ ու կոշտ քննադատություններ են առաջացրել գործընկեր պետությունների շրջանում, գրում է Turkish Minute-ը։

Հիշեցնենք, որ Անկարայում տեղի ունեցած կուսակցական ժողովի ժամանակ Էրդողանն ասել էր, որ ՀԱՄԱՍ-ն ահաբեկչական կազմակերպություն չէ, այլ խմբավորում, որը պայքարում է իրենց հողի համար։ Իսրայելի ԱԳՆ-ն առաջիններից էր, որը դատապարտել է այդ հայտարարությունները՝ ասելով, թե Էրդողանի խոսքերը չեն փոխի «սարսափները, որոնք տեսել է ամբողջ աշխարհը»՝ նկատի ունենալով հոկտեմբերի 7-ին ՀԱՄԱՍ-ի հարձակումները Իսրայելի վրա, որոնք էլ հանգեցրին պատերազմի։

Իսրայելից հետո ԱՄՆ Պետքարտուղարությունը նույնպես հանդես է եկել մեկնաբանությանբ՝ կրկնելով, որ ՀԱՄԱՍ-ը 1997 թվականից Միացյալ Նահանգների կողմից դասակարգվել է որպես ահաբեկչական կազմակերպություն:

Ըստ VOA թուրքական ծառայության՝ ԱՄՆ պատասխանից բացի՝ Կոնգրեսի անդամները երկկուսակցական նամակ են պատրաստել՝ ուղղված պետքարտուղար Էնթոնի Բլինքենին, որում նրան կոչ են անում պատասխանատվության ենթարկել Թուրքիային ՀԱՄԱՍ-ին աջակցելու գործում ունեցած դերի համար: Նամակը պատրաստել են Կոնգրեսի Հունաստանի հանձնախմբի համանախագահներ Քրիս Պապպասը և Գաս Բիլիրակիսը, սակայն, ըստ աղբյուրի, դեռևս չի կարելի հաստատել, որ այն ուղարկվել է։

Հանրապետական սենատոր Ռիք Սքոթը նույնիսկ կոչ է արել ԱՄՆ-ին «լրջորեն դիտարկել» ՆԱՏՕ-ին Թուրքիայի հետագա անդամակցության հարցը՝ Էրդողանի խոսքերի լույսի ներքո։

Իտալիայի փոխվարչապետ Մատեո Սալվինին իր հերթին Էրդողանի մեկնաբանությունները բնութագրել է որպես «լուրջ ու նողկալի»։

Գերմանիայի փոխկանցլեր Ռոբերտ Հաբեկը հայտարարել է, որ լիովին համաձայն չէ ՀԱՄԱՍ-ի վերաբերյալ Էրդողանի խոսքերի հետ։ Նա նշել է, թե ՀԱՄԱՍ-ը չի պայքարում պաղեստինյան բնակչության ազատության համար, այլ ընդհակառակը՝ կոտորում է իսրայելցիներին և պատասխանատվություն է կրում Գազայում մարդկանց կրած սարսափելի տառապանքների համար:

ԱՄՆ-ի հրեա առաջնորդներն էլ, որոնցից ոմանք վերջերս հանդիպել էին Էրդողանի հետ, խստորեն քննադատել են նրա դիրքորոշումը։ Ամերիկյան խոշոր հրեական կազմակերպությունների նախագահների ընկերակցության գործադիր տնօրեն Ուիլյամ Դարոֆը Էրդողանին անվանել է «շառլատան», որն ավելի շատ շահագրգռված է հրեաների դեմ բռնություն քարոզելու, քան խաղաղության հաստատման հարցում։

Էմմա Չոբանյան