ԱՄՆ Կոնգրեսի հանրապետականները դեմ են, որ Իսրայելին և Ուկրաինային օգնությունը տրամադրվի նույն փաթեթով

Երկու օր առաջ ԱՄՆ Կոնգրեսի Ներկայացուցիչների պալատի խոսնակ ընտրված հանրապետական ​​Մայք Ջոնսոնը հայտարարել է, որ Իսրայելին և Ուկրաինային ռազմական օգնություն տրամադրելու դիմումները պետք է առանձին քննարկվեն։ Ըստ նրա՝ դա իր կուսակիցների համերաշխ դիրքորոշումն է, որոնք մեծամասնություն ունեն ստորին պալատում, գրում է BBC-ի ռուսական ծառայությունը։

Անցյալ շաբաթ Ջո Բայդենի վարչակազմը Կոնգրես էր ուղարկել 2024 ֆինանսական տարվա համար լրացուցիչ բյուջետային հատկացումների երկար սպասված դիմումը։ Շուրջ 106 միլիարդ դոլար կազմող փաթեթի առյուծի բաժինն ուղղված է Ուկրաինայի պաշտպանունակության ուժեղացմանը (61 միլիարդ դոլար), իսկ մնացածն ակնկալվում է բաշխել Իսրայելին տրամադրվող օգնության, Հնդկա-խաղաղօվկիանոսյան տարածաշրջանում անվտանգության ամրապնդման և ԱՄՆ հարավային սահմանների անվտանգության ամրապնդման միջև:

Նախօրեին Ջոնսոնն առաջին անգամ այցելել է Սպիտակ տուն՝ որպես Ներկայացուցիչների պալատի խոսնակ, որտեղ կարճ զրույց է ունեցել նախագահ Ջո Բայդենի հետ, ինչպես նաև զրուցել նրա վարչակազմի անդամների հետ։

«Սպիտակ տան ներկայացուցիչներին ասացի, որ Ներկայացուցիչների պալատի հանրապետականների ընդհանուր կոնսենսուսն այն է, որ մենք պետք է տարանջատենք այդ հարցերը»,- ասել է Ջոնսոնը:

Նա նշել է, որ Իսրայելն առանձին թեմա է, և նախատեսում են առանձին նախագիծ ներկայացնել Իսրայելին ավելի քան 14 միլիարդ դոլարի օգնություն տրամադրելու համար։ Ջոնսոնի խոսքով՝ հանրապետականները պատրաստվում են դիտարկել, թե բյուջեի որ հոդվածները կարելի է կրճատել՝ Իսրայելին աջակցելու լրացուցիչ միջոցներ գտնելու համար։

Էմմա Չոբանյան