Քաղաքականություն
27.10.2023 | 12:35
ԱՄՆ պաշտպանության նախարարությունը հայտարարել է Սիրիայի արևելքում գտնվող երկու ռազմական օբյեկտներին օդային հարվածներ հասցնելու մասին, գրում է BBC-ի ռուսական ծառայությունը: Ըստ աղբյուրի՝ այդ օբյեկտները կապված են Իրանի Իսլամական հեղափոխության պահապանների կորպուսի հետ:
«Այս ճշգրիտ հարվածներն իրականացվել են ինքնապաշտպանության նպատակով և պատասխան են Իրաքում և Սիրիայում ԱՄՆ անձնակազմի դեմ իրականացվող մի շարք շարունակական և հիմնականում անհաջող հարձակումների, որոնք սկսվել են հոկտեմբերի 17-ից Իրանի հետ կապված զինված խմբավորումների կողմից», – ասել է Պենտագոնի ղեկավար Լլոյդ Օսթինը: Նրա խոսքով՝ հարվածները արտոնվել են ԱՄՆ նախագահ Ջո Բայդենի կողմից։
«Իրանի վստահված անձանց կողմից ԱՄՆ-ի անձնակազմի դեմ նման հարձակումներն անընդունելի են և պետք է դադարեցվեն», – ասել է Օսթինը՝ զգուշացնելով, որ եթե դրանք շարունակվեն, «ԱՄՆ-ը չի վարանի ձեռնարկել բոլոր անհրաժեշտ միջոցները իր քաղաքացիներին պաշտպանելու համար»:
Իսրայելի և պաղեստինյան ՀԱՄԱՍ խմբավորման միջև առճակատման ֆոնին վերջին օրերին ակտիվացել են Իրաքում և Սիրիայում ամերիկյան հենակետերի թիրախավորումը։ ԱՄՆ-ի և դաշնակից զորքերին առնվազն 12 հարված է հասցվել Իրաքում և 4 հարված՝ Սիրիայում: Ընդհանուր առմամբ տուժել է մոտ 20 զինվոր, նրանք հիմնականում թեթև վնասվածքներ են ստացել։
