17.02.2026 | 23:22
ՀՀ ԱԳ նախարարի տեղակալը Հռոմում ներկայացրել է COP17-ի Հայաստանի նախագահության առաջնահերթությունները
Ի պատասխան ՀՀ ԱԳՆ-ի` ՌԴ-ն Հայաստանի գործերի ժամանակավոր հավատարմատարին կանչել է ԱԳՆ
Քաղաքականություն
26.10.2023 | 18:08
Հոկտեմբերի 25-ին Մոսկվայում Հայաստանի գործերի ժամանակավոր հավատարմատարը կանչվել է ՌԴ ԱԳՆ, նրան են ներկայացրել «Ռուսաստանի դեմ հայկական լրատվամիջոցների հրապարակումները»: Այս մասին ամենշաբաթյա ճեպազրույցում հայտարարել է ԱԳՆ պաշտոնական ներկայացուցիչ Մարիա Զախարովան։
«Հոկտեմբերի 25-ին Մոսկվայում Հայաստանի դեսպանատան գործերի ժամանակավոր հավատարմատարը կանչվել է ՌԴ ԱԳՆ։ Նրա ուշադրությունը հրավիրվել են ամենաօդիոզ հրապարակումները՝ ուղղված Ռուսաստանի ղեկավարությանը, ռուս դիվանագետներին և, ի դեպ, ռուս խաղաղապահներին, որոնք վտանգում և զոհում են իրենց կյանքը, այդ թվում՝ Հայաստանի ժողովրդի անվտանգության համար։ Մատնանշվել է հանրապետության տեղեկատվական տարածքում անսանձ հակառուսական արշավի անընդունելիությունը»,- ասել է Զախարովան։
Նա նշել է, որ «անընդունելի է հակառուսական արշավը ՀՀ ինֆորմացիոն տարածքում, այդ թվում՝ հանրային հեռուստատեսության և իշխանության ենթակա ԶԼՄ-ներում ու Telegram-ալիքներում»։
Հիշեցնենք, որ 2023 թվականի հոկտեմբերի 23-ին «Առաջին ալիք» համառուսաստանյան դաշնային հեռուստատեսության եթերում թողարկված հաղորդման առնչությամբ, որի ընթացքում հնչեցվել էին վիրավորական և բացարձակապես անընդունելի արտահայտություններ Հայաստանի Հանրապետության բարձրաստիճան պաշտոնյաների հասցեին, ՀՀ ԱԳՆ էր կանչվել Հայաստանում Ռուսաստանի Դաշնության դեսպան Սերգեյ Կոպիրկինը: Դեսպանին հանձնվել էր բողոքի հայտագիր։
Էմմա Չոբանյան
