25.02.2026 | 17:23
Միրզոյանը Ժնևից մեկնել է Վարշավա
Իսրայելը պատրաստվում է ՀԱՄԱՍ-ի թունելները պարալիզացնող գազով հեղեղել․ MEE
Քաղաքականություն
26.10.2023 | 23:02
Պաղեստինյան դիմադրության խմբերը կանխատեսում են, որ Իսրայելը hեղեղելու է ՀԱՄԱՍ-ի թունելները պարալիզացնող գազով և քիմիական զենքով՝ ամերիկյան Delta ուժերի հրամանատարների հսկողության ներքո Գազայի հատվածի վրա անսպասելի հարձակման շրջանակում։ Այս մասին Middle East Eye-ին ասել է խմբավորումներին ծանոթ արաբական բարձրաստիճան աղբյուրը:
Նա ասել է, որ ըստ ԱՄՆ-ից արտահոսած տեղեկության՝ Իսրայելը և ԱՄՆ-ը հույս ունեն հասնել անակնկալ գործողության՝ ներթափանցելով ՀԱՄԱՍ-ի թունելներ՝ փրկելու շուրջ 220 պատանդներին և սպանելու ՀԱՄԱՍ-ի ալ-Քասամ բրիգադներին պատկանող հազարավոր զինվորների։
Լրատվամիջոցը նշում է, որ չի կարող ինքնուրույն ստուգել արտահոսքի հավաստիությունը։
«Ծրագիրը հիմնված է անսպասելիության տարրի վրա ճակատամարտում վճռականորեն հաղթելու համար՝ օգտագործելով միջազգայնորեն արգելված գազերը, հատկապես՝ նյարդային պարալիզացնող գազը և քիմիական զենքը: Մեծ քանակությամբ գազ կտեղափոխվի թունելներ»,- ասել է աղբյուրը։
Middle East Eye-ը մեկնաբանություն ստանալու համար դիմել է Սպիտակ տանը և ԱՄՆ Պաշտպանության նախարարությանը, սակայն դեռևս պատասխան չի ստացել։
Արտահոսած տեղեկատվության մեջ ասվում է, որ Իսրայելի ցամաքային ներխուժման հետաձգումն ապատեղեկատվություն է, որի նպատակն է անակնկալի բերել բազմակողմ հարձակման ժամանակ, որը ներառում է իսրայելական կոմանդոսների իջեցում Գազայի հյուսիսում և ափի երկայնքով: Աղբյուրի փոխանցմամբ՝ հարձակման օպերատիվ մանրամասներն արդեն համաձայնեցված են։
Էմմա Չոբանյան
