Ադրբեջանում ընդդիմադիր ակտիվիստ է կալանավորվել՝ Հեյդար Ալիևի արձանը նկարահանելու համար

Օգոստոսից անհետացած Ադրբեջանի ընդդիմադիր «Ժողովրդական ճակատ» կուսակցության անդամ Էլբեյ Քերիմլին, պարզվել է, կալանավորված է թմրանյութեր պահելու մեղադրանքով, գրում են ադրբեջանական լրատվամիջոցները։

Այն, որ ակտիվիստը կալանավորված է, մտերիմներին հայտնի է դարձել միայն հոկտեմբերի 24-ին։

«Նրանից գրեթե երկու ամիս լուր չկար։ Նրա կոնտակտային համարներով զանգահարել են կուսակցական ընկերները, որոնց չեն պատասխանել։ Ոստիկանությունից էլ տեղեկություն չեն կարողացել ստանալ։ Երեկ անհայտ անձը զանգահարել և հայտնել է, որ Էլբեյ Քերիմլին պահվում է Բաքվի թիվ 1 քննչական մեկուսարանում»,- լրատվամիջոցներին պատմել է կուսակցության անդամներից մեկը։

Այս ամենը տեղի է ունեցել այն բանից հետո, երբ Քերիմլին Բաքվում տեսանկարահանել է Իլհամ Ալիևի հոր՝ Ադրբեջանի նախկին նախագահ Հեյդար Ալիևի արձանը։

Հավելենք, որ վերջին օրերին Ադրբեջանի իշխանությունները ավելի մեծ ջանասիրությամբ են շարունակում ընդդիմադիրների հետապնդումները։ Մասնավորապես, «Ժողովրդական ճակատ» կուսակցության մեկ այլ անդամ՝ Մեհման Գաբիբովը մի քանի օր առաջ ծեծի էր ենթարկվել քաղաքացիական հագուստով անձանց կողմից։

Ակտիվիստի խոսքով՝ իրեն մահակով ծեծել են՝ միաժամանակ դաժան վիրավորանքներ տեղալով։

«Ինձ ասացին՝ ոտքի տակ մի ընկեք, ուզում եք գալ իշխանությա՞ն, մենք թույլ չենք տա, որ դա անեք»,- պատմել է Գաբիբովը։

Օրերս էլ ակտիվիստ Մոհադդին Օրուջևը 30 օրով կալանավորվել է՝ սոցցանցում Ադրբեջանի նախագահ Իլհամ Ալիևին քննադատող գրառման համար։

մմա Չոբանյան